Ndërsa udhëheqësit e vendeve të Eurozonës bënë
publike masat për të mbrojtur institucionet financiare dhe për të garantuar
dhënien e huave ndërbankare, shefi i Fondit Monetar Ndërkombëtar Dominik
Shtraus-Kahn tha të dielën në Uashington se tanimë ka nisur një program i
bashkërenduar dhe efektiv për t'i bërë ballë krizës financiare.
Zoti Shtraus Kahn foli në mbyllje të takimit të ministrave të financave të vendeve të zhvilluara dhe atyre në zhvillim. Ai tha se masat urgjente të bëra publike nga udhëheqësit evropianë në Paris janë shumë pozitive.
"Unë kam besim sepse besoj se
çfarë është bërë këto ditë duke filluar që nga deklarata e përbashkët e shtatë
vendeve më të industrializuara, duke vazhduar më pas me takimin vjetor të
Fondit Monetar Ndërkombëtar dhe Bankës Botërore apo takimi i udhëheqësve të
vendeve të eurozonës është pikërsht veprimi i duhur."
Franca, Gjermania, Italia and vende të tjera të
eurozonës do të garantojnë dhënien e huave ndërbankare dhe do t'u japin para
kesh bankave në nevojë. Këto masa kanë
për qëllim të rikthejnë besimin e investitorëve dhe të bëjnë që tregjet të
funksionojnë siç duhet. Të shtunën zoti
Shtraus-Kahn paralajmëroi se
sistemi financiar global po shkonte drejt shkatërrimit.
Sipas presidentit të Bankës Botërorë, Robert Zëllik, kriza financiare së bashku me rritjen e çmimeve të ushqimit dhe karburantit që i parapriu krizës, kanë varfëruar sivjet rreth 100 milionë vetë në botë. Dje zoti Zëllik u tha gazetarëve se problemet e papara ndonjëherë në tregjet financiare përbëjnë një kërcënim të madh për vendet në zhvillim.
"Kjo ishte një katastrofë që u shkaktua nga vetë njerëzit. Edhe veprimet dhe përgjigjet ndaj krizës varen nga ne. Duhet gjithashtu të sigurohemi që, ndërsa qeveritë dhe taksapaguesit e përqendrojnë vëmendjen në problemet financiare vendore, ato nuk do të tërhiqen nga zotimet e tyre për të shtuar ndihmën për vendet në zhvillim."
Kriza ekonomike, gjatë së cilës shumë tregje
botërore humbën rreth 20 përqind të vlerave të tyre vetëm gjatë javës së
fundit, tërhoqën vëmendjen e zyrtarëve financiarë gjatë takimeve vjetore të
FMN-së dhe Bankës Botërore në Uashington. Ata e përshëndetën një plan veprimi
për masa urgjente të bashkërenduara, i cili u prezantua të premten nga
ministrat e financave të Shteteve të Bashkuara, Evropës dhe Japonisë. //ad//