Senatori demokrat Barak Obama është afrikano-amerikani i parë në historinë e Shteteve të Bashkuara që merr emërimin e një partie të madhe politike si kandidat për president. Anketat tregojnë se zoti Obama ka epërsi ndaj rivalit republikan, senatorit John McCain. Sipas këtyre anketave, nëse zgjedhjet zhvillohen sot, zoti Obama mund të bëhej presidenti i parë afrikano-amerikan i Amerikës. Çështja që shtrojnë analistët është se sa të gatëshme janë Shtetet e Bashkuara për një president afrikano-amerikan.
Në muajin mars, Barack Obama, komentoi për racën e tij dhe për ndikimin që kjo mund të ketë mbi zgjedhjet
presidenciale. Komentet i referoheshin në atë kohë zgjedhjeve brenda Partisë
Demokrate.
"Megjithë joshjen për ta parë kandidaturën time me një lente thjesht
racore, ne arritëm fitore të rëndësishme në disa shtete që kanë popullsi ndër
më të bardhat në Amerikë."
Barack Obama mori miliona vota nga demokratët e bardhë gjatë garave paraprake
kundër senatores Hillari Klinton.
Por tani ai është në një fushatë kombëtare kundër republikanit Xhon Mekein dhe
shpreson të fitojë në shtete të cilat janë tradicionalisht republikane, si
Virxhinia dhe Virxhinia Perëndimore. Po ashtu edhe në shtete si Pensilvania, të
cilat janë tradicionalisht demokrate por ku votuesit e bardhë ia dhanë votën
senatores Klinton në zgjedhjet paraprake. Shumë njerëz në këto shtete kanë lënë
të kuptohet se raca do të jetë faktor në zgjedhjet e nëntorit.
Virxhinia Perëndimore është një shtet me një numër të madh punëtorësh të
bardhë. Në qytetin Franklin, Steve Miller ka në pronësi një hotel dhe një
restorant. Ai thotë se komuniteti i tij nuk do ta mbështesë Obamën.
"Nuk mendoj se kjo është diçka raciste por njerëzit në Virxhinian
Perëndimore nuk janë të sigurt nëse janë gati për të patur një president
afrikano-amerikan."
Kur zonja Klinton mposhti senatorin Obama në zgjedhjet e Virxhinias Perëndimore,
një anketë tregonte se për çdo dy në dhjetë votues, raca ishte një faktor.
Ed Tallman, redaktor i një gazete në Franklin, thotë se e di se përse njerëzit
në këtë shtet kanë një problem me Obamën.
"Kur një afrikano-amerikan ka pushtetin politik, shumë banorë në qytetet e
vogla të Virxhinias Perëndimore mendojnë se me politikat e tij ai do të
favorizojë më shumë zezakët se sa të bardhët."
84-vjeçari Xhef Bouman, pronar i një dyqani pajisjesh mekanike, thotë se
Amerika është e gatëshme për një president afrikano-amerikan por shton se Obama
ka të metat e tij.
"Ai nuk ka përvojën e duhur dhe kjo e dëmton më tepër se sa raca."
Vesla Uivër, profesore në Universitetin e Virxhinias ka studiuar nga afër
çështjen se si votuesit reagojnë ndaj ngjyrës së kandidatëve.
"Në Shtetet e Bashkuara ekziston një prirje për të mos i vënë rëndësi
racës ose për të mos krijuar përshtypjen se po voton bazuar mbi racën. Prandaj
kur një votues ka përballë një kandidat të bardhë dhe një zezak, ai përpiqet të
mos e marrë vendimin bazuar mbi racën."
Edhe shteti verilindor i Pensilvanisë ka një shtresë të gjerë punëtorësh të
bardhë. Ky shtet, me më shumë se 8 milionë votues të regjistruar, ka rëndësi
kritike për Obamën. Edhe këtu, zonja Klinton fitoi ndaj zotit Obama në
zgjedhjet paraprake demokrate.
80-vjeçarja Lillian Kepler nga Luistauni i Pensilvanisë, thotë se problemi i saj
me zotin Obama nuk ka lidhje me racën.
"Jo, jo sepse është zezak por se nuk i ka aftësitë e senatorit
Mekein."
Por në kampuset universitare, edhe në shtetet jugore republikane, Obama është
mjaft popullor mes studentëve.
Studentët e Universitetit të Virxhinias, Geoff Skelly dhe Chris Blank thonë se
raca do të jetë një faktor në zgjedhje por jo për ata vetë.
"Mendoj se do të jetë një faktor për disa njerëz, por për një përqindje
shumë të vogël votuesish që mund të vendosë ose jo fatin e zgjedhjeve."
"Sinqerisht mendoj se njerëzit që nuk do të votojnë për Obamën për shkak
se është afrikano-amerikan, nuk do të votonin edhe sikur të ishte një demokrat
tjetër. "
Zëri i Amerikës intervistoi dhjetra votues kudo në vend dhe shumica thanë se
Amerika është e gatëshme për të zgjedhur një president afrikano-amerikan. Por
vëzhguesit politikë thonë se është e vështirë të gjesh me saktësi se ç’mendojnë
njerëzit për racën sepse shumë prej tyre e fshehin atë që ndjejnë realisht.
Sipas vëzhguesve, shpesh votuesit nuk e kuptojnë se po ndikohen nga raca. //rd//