Presidenti i zgjedhur Barak Obama tha se ekonomia amerikane, do të ketë rënie të mëtejshme para se të rimëkëmbet.
Në një intervistë televizive që dha pak më parë zoti Obama tha se 2 milionë të papunët dhe tregu financiar botëror janë një problem i madh për ekonominë amerikane. Ai tha gjithashtu se qeveria nuk duhet ta lejojë falimentimin e industrisë amerikane të makinave.
Por ai shtoi se qeveria nuk duhet t'i drejtojë kompanitë e automobilëve dhe se çdo ndihmë duhet të jepet me kushtin që ato të ndërtojnë makina që nuk harxhojnë shumë karburant.
Emërim i ri në administratën e ardhshme Obama
Presidenti i zgjedhur amerikan Barak Obama ka zgjedhur gjeneralin në pension Erik Shinseki, i cili ishte ndër ata që paralajmëruan për nevojën e një numri më të madh trupash për ndërhyrjen në Irak, si Sekretari i Çështjeve të Veteranëve.
Zoti Obama e njoftoi emërimin e gjeneralit dje në një intervistë televizive dhe do ta bëjë zyrtarisht të ditur zgjedhjen e tij në një konferencë për shtyp në Çikago sot. Zoti Obama tha në intervistën që dha dje për rrjetin televiziv NBC se ai mendon se zoti Shinseki është personi më i duhur për t’i nderuar trupat amerikane kur të kthehen nga lufta.
Gjenerali Shinseki u largua nga puna
gjatë administratës së Presidentit Bush, pasi tha se nevojiteshin më shumë
trupa për të realizuar ndërhyrjen amerikane në Irak në vitin 2003, krahasuar me
numrin e trupave që donte të dërgonte Sekretari i atëhershëm i Mbrojtjes,
Donald Rmsfeld. Zoti Obama tha se gjenerali Shinseki kishte të drejtë. Kritikët
kanë thënë se kaosi që pasoi ndërhyrjen amerikane në Irak ishte më së shumti
rezultat i numrit të pamjaftueshëm të trupave.