Kryetari i Gjykatës së Lartë amerikane Xhon Roberts u desh ta lexojë mbrëmë për herë të dytë tekstin e betimit përpara Presidentit Barak Obama pasi gjatë ceremonisë së inaugurimit ditën e martë pati një ngatërrim fjalësh.
Zoti Obama e përsëriti tekstin solemn të betimit mbrëmë në Shtëpinë e Bardhë pasi, sipas zyrtarëve, kjo çështje meritonte shumë kujdes.Kur po lexonte tekstin përpara zotit Obama gjatë inaugurimit, zoti Roberts ngatërroi vendin e fjalës “me besnikëri” gjë që krijoi një pauzë të shkurtër mes të dyve.
Ndërsa betimin e parë e ndoqën rreth 2 milion njerëz, pa përfshirë miliona që e panë në televizion, në përsëritjen e betimit ishin vetëm 9 persona, 4 ndihmës të presidentit, katër gazetarë dhe një fotograf i Shtëpisë së Bardhë. Gjatë përsëritjes së betimit, zoti Obama nuk përdori Biblën.//ek//