Policia greke thotë se ka parandaluar një sulm të mundshëm me makinë-bombë para zyrave të një banke amerikane në Athinë.
Një zëdhënës i policisë tha se lënda plasëse ishte futur në bidonë benzine të fshehur brenda një makine të parkuar në lagjen periferike Kifissia.
Askush nuk ka marrë përgjegjësinë për sulmin e planifikuar. Bomba u zbulua disa orë pasi persona në motorçikleta hodhën dje një paketë të dyshimtë pranë një stacioni televiziv në Athinë. Nuk pati njoftime për dëme në njerëz.
Grupet e majta në Greqi kanë organizuar një numër sulmesh me armë zjarri gjatë javëve të fundit.
Në fillim të muajit, një grup i vetë-quajtur “Sekti Revolucionar” mori përgjegjësinë për një sulm ndaj një rajoni policie në periferi të Athinës. (ze)