Presidenti rus Dmitri Medvedev tha se Rusia do të angazhohet në një riarmatim në shkallë të gjerë për t’iu përgjigjur terrorizmit dhe përpjekjeve të NATO-s për t’u shtrirë drejt kufijve rus.
Presidenti Medvedev i bëri këto komente sot në Moskë në një takim me shefat e ushtrisë. Sipas agjencive ruse të lajmeve, zoti Medvedev tha se riarmatimi – që do të fillojë në vitin 2011, do të përqëndrohet në forcat strategjike bërthamore. Ai tha se Rusia ka burimet për të financuar këtë projekt megjithë krizën financiare globale.
Rusia ka kritikuar përpjekjet e ish presidentit Bush për të anëtarësuar Ukrainën dhe Gjeorgjinë në NATO-s si një kërcënim i drejtëpërdrejtë në sigurinë e saj kombëtare. Moska i ka cilësuar si kërcënim të ngjashëm planet e Shteteve të Bashkuara për ndërtimin në Poloni dhe në Republikën Çeke të një sistemi të mbrojtjes nga raketat.
Njoftimi i sotëm bëhet megjithë takimet e kohëve të fundit në Moskë dhe në Uashington për të përmirësuar marrëdhëniet mes dy vendeve.