Në
Kosovë, besimtarët e ritit ortodoks po kremtojnë Festën e Pashkëve.
Autoritetet kanë përgëzuar besimtarët ortodoks, që kryesisht i takojnë
komunitetit serb, ndërsa kanë bërë thirrje për paqe e tolerancë.
Besimtarët ortodoksë në Kosovë,që kryesisht i takojnë komunitetit serb, po kremtojnë sot Festën e Pashkëve,ndërsa zyrtarët më të lartë vendas e ndërkombëtarë po i përgëzojnë ata me thirrjet për paqe e tolerancë.
Me këtë rast, presidenti, Fatmir
Sejdiu, ka përcjellë porosi paqeje dhe dashurie për të gjithë qytetarët e
Kosovës. Ai u ka premtuar qytetarëve të komunitetit serbë se Institucionet e
Kosovës do të punojnë me vendosmëri, me qëllim që të gjithë qytetarët, pa
dallim etnie e besimi, të jenë plotësisht të lirë dhe të ndihen të dobishëm për
atdheun e tyre.
Edhe kryeministri Hashim Thaçi,
në përgëzimin e tij uron besimtarët ortodoks duke nënvizuar se të gjithë
qytetarët e Kosovës do të vazhdojnë të kremtojnë festat e tyre në paqe e
tolerancë, në solidaritet dhe mirëkuptim duke shikuar vetëm nga ardhmëria e
sigurt euroatlantike.
Në të gjitha kishat ortodokse në Kosovë, mbrëmë janë mbajtur liturgji fetare, ndërsa ceremonia kryesore është mbajtur në Manastirin e Deçanit, në Kosovën perëndimore, të cilët dy ditë më parë e vizitoi Presidenti i Serbisë, Boris Tadiç.
Vizita e presidentit serb, e cila
mundësua me lejen e kryeministrit të vendit, Hashim Thaçi, ngjalli reagime të
shumta, meqë gjatë qëndrimit në Manastir ai tha se ka ardhur për të përcjellë
porosi të paqes për të gjithë, ndërsa Kosovën e quajti pjesë të Serbisë.
Kjo vizitë u mundësua pasi që
përfaqësues të lartë të Bashkimit Evropian i kërkuan qeverisë që të lejojë
presidentin serb të vizitojë Kosovën.
Leja e qeverisë për presidentin
serb ishte bërë me kushtin që ky i fundit të mos bëjë deklarata politike.
Opozita dhe mjetet e informimit thanë se me deklaratat e tij, presidenti serb
shpërfilli institucionet e Kosovës.
Pavarësisht kësaj, kryeministri i vendit Hashim Thaçi tha se leja për vizitën e presidentit serb ishte dhënë në interes të shtetit të Kosovës. Kjo leje është mbështetur edhe nga ambasada amerikane në Prishtinë e cila nëpërmjet një deklarate e cilësoi këtë vendim të një shteti sovran, i sjellë në frymën e Planit të Martti Ahtisarit, dhe në interes të marrëdhënieve fqinjësore.//mm//