Një sulm vetëvrasës me bombë në një xhami në Pakistanin veriperëndimor shkaktoi të paktën 32 të vrarë dhe dhjetra të plagosur, të cilët po mernin pjesë në lutjet e së premtes. Policia tha se shpërthimi ndodhi në Distrikin e Sipërm, pranë kufirit me Afganistanin, ku ushtria pakistaneze ka zhvilluar luftime kundër kryengritësve talebanë.
Dje, Kombet e Bashkuara kërkuan ndihma financiare shtesë për t’u ardhur në ndihmë mbi 2 milionë njerëzve të zhvendosur nga luftimet. Kreu i Agjencisë Humanitare të OKB-së në Pakistan paralajmëroi se disa nga furnizimet mund të mbarojnë deri në korrik, në se bashkësia ndërkombëtare nuk merr masa pa humbur kohë.
Përfaqësuesi i posaçëm i SHBA-së në Afganistan dhe Pakistan, Richard Hollbruk, bëri të njohura planet për dhurimin e një ndihme shtesë prej 200 milionë dollarësh për refugjatët. Dje, ai vizitoi një kamp në Mardan, ku bisedoi me qytetarët e zhvendosur dhe diskutoi për nevojat e tyre.