Ministri i Jashtëm britanik, David Miliband, tha sot se ai hedh poshtë kategorikisht idenë se vendet e huaja po manipulojnë protestuesit në Iran.
Kryetarja e komisionit të senatit amerikan për çështjet e zbulimit, senatorja Dajanë Fainstein, tha gjithashtu se me sa di ajo, “nuk ka pasur manipulim të njerëzve pas zgjedhjeve”.
Sot, Irani dëboi korrespondentin e përhershëm të BBC-së në Teheran pasi fajësoi këtë transmetim britanik si edhe Zërin e Amerikës për “nxitje të protestave pas zgjedhjeve”.
Drejtori i Zërit të Amerikës, Dan Austin, hodhi poshtë akuzat e Iranit, duke thënë se “Zëri i Amerikës po punon shumë për t’u dhënë njerëzve në Iran lajme dhe informacione të sakta, të gjithanshme dhe të besueshme”.
Ai i bëri gjithashtu thirrje qeverisë së Iranit që t’u japë fund përpjekjeve “për të kufizuar lirinë e informimit për qytetarët e vet”. Ka njoftime se Irani ka bllokuar transmetime të Zërit të Amerikës.
QINDRA DEMONSTROJNË NË EUROPË DHE SHBA
Qindra njerëz u mblodhën dje në vende të ndryshme të
Europës si dhe në Shtetet e Bashkuara për të treguar solidaritetin e
tyre me protestat e opozitës në Iran.
Udhëheqësit
perëndimorë ndërkohë bënë thirrje që qeveria iraniane të tregohet e
përmbajtur në reagimin e saj ndaj demonstratave.
Në Gjermani,
disa qindra njerëz, mes tyre edhe iranianë, marshuan nëpër rrugët e
Berlinit duke kërkuar hetime rreth akuzave për manipulime në zgjedhjet
parlamentare të Iranit.
Kancelarja gjermane, Angela Merkel tha
se Gjermania është në anën e popullit iranian. Ajo i bëri thirrje
qeverisë së Iranit të lejojë demonstratat paqësore.
Në Francë, demonstruesit u mblodhën përballë ambasadës iraniane për të protestuar kundër dhunës në Iran.
Presidenti
francez, Nikola Sarkozi kritikoi ashpër shtypjen e protestave nga
qeveria duke thënë se kjo është e pajustifikueshme.
Ministri i
jashtëm italian Franco Frattini i kërkoi qeverisë së Iranit të marrë
masa menjëherë për të gjetur një zgjidhje paqësore të krizës së
brendshme. Ndërsa një zëdhënës i ministrisë së jashtëme spanjolle tha
se autoritetet iraniane duhet ta zgjidhin çështjen e manipulimit të
votimeve me transparencë të plotë.
Dje demonstruesit u
mblodhën edhe në nju Jork, një ditë pasi Presidenti Barak Obama i bëri
thirrje qeverisë së Iranit “të ndalë çdo veprim të dhunshëm dhe të
padrejtë kundër popullit të vet”, reagimi më i fortë deri tani i zotit
Obama ndaj trazirave në Iran.
Zyrtarë të Shtëpisë së Bardhë
thanë se Presidenti u takua përsëri dje me këshilltarët e politikës së
jashtëme për t’u informuar mbi gjendjen në Iran. //mm