Në
Kosovë, Presidenti dhe Kryeministri i vendit e shpallën të mbyllur çdo
bisedë mbi protokollin e paralajmëruar për t’u nënshkruar ndërmjet
EULEX-it dhe Ministrisë së Punëve të Brendshme të Serbisë. Zyrtarë të
EULEX-it thanë se do të presin udhëzime nga Brukseli se si të veprohet
më tej rreth këtij protokolli, që sipas tyre synon vendosjen e
bashkëpunimit me autoritetet serbe në funksion të luftës kundër krimit
të organizuar dhe veprimtarive të tjera të paligjshme. Çështja e këtij
protokolli nxiti kundërshtime të ashpra në Prishtinë që u pasuan edhe
me dëmtimin e 28 makinave të EULEX-it gjatë një proteste të lëvizjes
Vetëvendosje.