Rezultatet e pjesshme që kanë dalë deri tani nga zgjedhjet presidenciale të Afganistanit tregojnë se presidenti Hamid Karzai e ka rritur epërsinë e tij, megjithëse është ende herët për të parashikuar rezultatet e përgjithshme.
Zyrtarët e zgjedhjeve thonë se shifrat e fundit përfshijnë votat e numëruara në 35 përqind të qendrave të votimit të përdorura në votimet e 20 gushtit.
Autoritetet thonë se nga votat e numëruara deri tani, zoti Karzai kryeson me 46 përqind, krahasuar me rivalin e tij kryesor Abdullah Abdullah, i cili ka 31 përqind.
Presidenti Karzai ende nuk ka vota të mjaftueshme për të shmangur balotazhin e zgjedhjeve, të cilat përfliten për manipulime të shumta.
Në zhvillime të tjera, departamenti amerikan i shtetit mohoi njoftimet e mediave afgane se Shtetet e Bashkuara po nxit formimin e një qeverie koalicioni në Afganistan.
Deklarata thotë se Shtetet e Bashkuara nuk mbështesin apo kundërshtojnë asnjë nga kandidatët, por janë të interesuara vetëm në një proces të besueshëm zgjedhor.
Ndërkohë, kryeministri britanik Gordon Braun u bëri një vizitë të papritur trupave britanike në Afganistanin jugor sot. Ai i premtoi trupave mbështetje më të madhe në luftën e tyre kundër kryengritësve talebanë, dhe pasije për t’i mbrojtur ata nga bombat në anë të rrugës.