Nënpresidenti amerikan Xho Biden ka shkuar në Irak, ku do të bisedojë me udhëheqësit kryesorë të vendit dhe do të vizitojë trupat amerikane në Bagdad.
Një zëdhënës i Shtëpisë së Bardhë tha se nënpresidenti do të shprehë “përkushtimin e fuqishëm amerikan për të ardhmen dhe unitetin kombëtar në Irak”.
Zoti Biden mbikqyr politikën e administratës Obama në Irak, ndërsa po merren hapa për tërheqjen e trupave amerikane prej andej deri në gusht të vitit 2010.
Ndërkohë, një gazetar irakian i cili gjuajti me këpucë ish presidentin amerikan Xhorxh W. Bush, u lirua nga burgu. Ai tha se gjatë 9 muajve që qëndroi në burg e kishin torturuar.
Autoritetet irakiane e liruan sot Muntazer al-Zaidin nga një burg i Bagdatit pasi e kreu dënimin prej 9 muajsh. Gazetari Al Zaidi mbajti një konferencë shtypi në stacionin televiziv al-Baghdadia, ku ai punonte.
Ai tregoi se gjatë kohës që qëndroi në burg e kishin torturuar me rrahje dhe me goditje elektrike. Al Zaidi dukej në gjendje të mirë shëndetësore, vetëm se i mungonte një dhëmb. Ai tha se ka frikë se mos e vrasin dhe se mos e ndjekin agjencitë amerikane të zbulimit.
Al-Zaidi gjuajti me këpucë ish presidentin Bush dhe e quajti atë “qen” dhjetorin e kaluar në Bagdat gjatë një konference të përbashkët me kryeministrin irakian Nuri al-Maliki. Zoti Bush u përkul duke shmangur goditjen.