Kandidati i opozitës afgane
Abdullah Abdullah thotë se nuk do të marrë pjesë në raundin e dytë të
zgjedhjeve presidenciale, ndërkohë që mbeten vetëm 6 ditë nga data e
balotazhit.
Abdullah Abdullah e deklaroi vendimin e tij sot në Kabul, duke akuzuar qeverinë se nuk po përmbush kërkesat e tij për zgjedhje të drejta.
Ish-Ministri i Jashtëm nuk ka kërkuar që afganët të bojkotojnë zgjedhjet. Ai u bëri thirrje përkrahësve të tij të tregohen të matur dhe të mos dalin në rrugë për protesta.
Zyrtarët e zgjedhjeve thonë se balotazhi do të zhvillohet, megjithëse zoti Karzai është i vetmi kandidat në zgjedhje.
Zëdhënësi i fushatës së presidentit tha se zoti Karzai mendon se zhvillimi i zgjedhjeve është veprimi i duhur në interes të popullit afgan.
Ambasada amerikane në Kabul tha sot se Shtetet e Bashkuara mbeten të angazhuara për të mbështetur popullin afgan në realizimin e një procesi elektoral kushtetues. //ad//