Partia Demokratike pritet të zhvillojë nesër kongresin e saj
të radhës për të diskutuar sfidat e qeverisjes gjatë mandatit të dytë në
pushtet, si dhe për të zgjedhur drejtuesit e rinj.
Sipas të dhënave të deritanishme, kryeministri Sali Berisha
do të kandidojë dhe do të rizgjidhet në postin e kryetarit të Partisë
Demokratike, ndërsa nuk është bërë publik ndonjë kandidat tjetër përballë tij
as edhe formalisht.
Në Kongresin e PD u njoftua se, krahas zotit Berisha, nesër
do të mbajnë fjalime edhe dy nënkryetarët dhe sekretari i përgjithshëm.
Sipas njoftimit të PD, pas 4 fjalimeve do të nisë procesi i
votimit për të zgjedhur forumet drejtuese, ku në Këshillin Kombëtar pritet të
ketë jo pak ndryshime.
Kongresi i planifikuar për në datën 12 dhjetor, ditën e themelimit
të Partisë Demokratike, u shty 2 ditë për shkak të një takimi që kryeministri
Berisha zhvilloi me Papa Benediktin e 16-të në Vatikan.
Në zgjedhjet e përgjithshme të 28 qershorit Partia
Demokratike fitoi një mandat të dytë qeverisës, falë edhe koalicionit që
ndërtoi me Lëvizjen Socialiste për Integrim.
Vazhdimi i reformave ekonomike, integrimi i vendit në Bashkimin Europian dhe goditja e krimit të organizuar dhe trafiqeve pritet të jenë në qendër të diskutimeve të Kongresit të Partisë Demokratike.
***
Ndërkohë, edhe kundërshtarët e majtë të demokratëve, Partia
Socialiste e opozitës ka njoftuar se do të nisë nesër në Durrës dhe qytete të
tjera një seri tubimesh protestuese kundër politikave ekonomike dhe sociale të
qeverisë.
Seria e tubimeve socialiste do të zgjatë një javë në 8
qytete të mëdha të vendit dhe do të kulmojë me një tubim në kryeqytet më 21
dhjetor.
Në qendër të vëmendjes do të jenë kriza ekonomike dhe
mbrojtja e bizneseve, krahas parrullave të mirënjohura për rishikimin e
materialeve zgjedhore.
Opozitarët kanë pohuar se këto protesta do të kenë një
karakter vendor, të organizuara nga degët e PS në rrethe, dhe do të trajtohen
vështirësitë e qytetarëve në jetën e përditshme.
Veprimtari të tjera politike janë projektuar nga opozita socialiste
pas vitit të ri, në qendër të të cilave mbetet kërkesa për hetimin e zgjedhjeve
të 28 qershorit.
Partia Socialiste e opozitës ka bojkotuar qysh nga dita e
parë parlamentin e ri që doli nga zgjedhjet.
Ajo ka kërkuar rihapjen e kutive të votimit dhe rishqyrtimin
e materialeve zgjedhore, me pretendimin se rezultatet përfundimtare të
zgjedhjeve nuk pasqyrojnë saktë mendimin e qytetarëve, pasi në dokumenta ka
parregullsi.
Kjo kërkesë është hedhur poshtë me vendosmëri nga Partia
Demokratike dhe Lëvizja Socialiste për Integrim, sepse sipas tyre, për ato
rezultate janë shprehur një herë gjykatat e vendit, dhe se vendimet e gjykatave
nuk mund të rihetohen nga politikanët. //mm//