Presidenti Barak Obama tha se masat ndërkombëtare për sanksione të reja kundër Iranit po lëvizin mjaft shpejt pas deklaratave të Iranit se po intensifikon pasurimin e uraniumit.
Zoti Obama u tha gazetarëve në Shtëpinë e Bardhë se Irani duket se nuk e ka përfillur ofertën e tij për t’u angazhuar në bisedime. Ai tha se ngurrimi i Iranit për të pranuar një propozim të ofruar me ndërmjetësimin e OKB-së për ta bërë pasurimin e uraniumit jashtë vendit tregon se regjimi islamik synon ta përdorë uraniumin për qëllime ushtarake.
Dje Irani tha se e ka rritur pasurimin e uraniumit në nivelin 20 përqind për të furnizuar një reaktor bërthamor për qëllime mjeksore. Fuqitë perëndimore janë të shqetësuara se programi bërthamor i Iranit synon prodhimin e armëve atomike por Teherani thotë se qëllimet e tij janë paqësore.
Zoti Obama nuk njoftoi ndonjë plan konkret për zbatimin e sanksioneve të reja. Ai shtoi se ende ka vend për diplomaci me Iranin.