Lidhje

Kalendari historik i datës 14 maj - 2001-05-15


Më 14 maj 1948, Shtetet e Bashkuara njohën zyrtarisht shtetin e ri të Izraelit. Njohja diplomatike nga ana e Shteteve të Bashkuara pasoi një votim në Asamblenë e Përgjithshme të OKB-së për ndarjen e Palestinës në dy shtete të pavarura, arab dhe izraelit. Presidenti amerikan, Harry Truman, e njohu qeverinë e përkohshme si autoritet de facto i shtetit të ri izraelit. Gati në të njëjtën kohë, vendet arabe të Lindjes së Mesme i shpallën luftë Izraelit. Kjo do të ishte vetëm njëra prej disa luftrave ndërmjet Izraelit dhe vendeve fqinje gjatë historisë prej pesë dekadash të Izraelit.

Më 14 Maj të vitit 1998, vdiq në Los Angeles artisti i madh Frank Sinatra. Këngëtari dhe aktori 82-vjeçar kishte vite që vuante nga zemra. I lindur në vitin 1915 në Nju Xhersi, në brigjet lindore të Shteteve të Bashkuara, Francis Sinatra u shqua pothuajse në çdo aspekt të industrisë së argëtimit në shekullin 20. Karierën e filloi me disa komplekse të famshme dhe më vonë e gjeti veten si këngëtar solo. Ai nxorri qindra disqe të vlerësuara lart nga kritika. Ai luajti role kryesore edhe në filma dhe drejtoi programe radiofonike dhe televizive. Sinatra fitoi çmime të shumta “Grammy” nga industria e disqeve, një çmimim “Emmy” për specialin televiziv, “Frank Sinatra: një njeri dhe muzika e tij” dhe një çmim Oscar për rolin e një ushtari në filmin e vitit 1953 “Prej këtu në Përjetësi”. Si këngëtar, Sinatra adhurohej jo vetëm për fuqinë dhe diapazonin e zërit të tij, por gjithashtu për përgatitjen e gjithanshme si artist, tekstin e qartë dhe aftësinë për t’i dhënë kuptim fjalëve që ai këndonte. Kënga “Hiq dorë nga ëndrrat”, e cila shërbente si sigël mbylljeje në radio, ishte e vetmja këngë e Frank Sinatrës, e cila u luajt në funeralin e tij më 20 Maj të vitit 1998.

XS
SM
MD
LG