Më 25 shkurt 1964, Cassius Clay tronditi botën e boksit me fitoren ndaj kampionit Sonny Liston. Clay, i njohur për shpejtësinë në ring dhe grushtat e njëpasnjëshëm thoshte se në ring lëvizte si flutur dhe pickonte si bleta. Ekspertët e boksit kishin parashikuar që boksieri i ri Clay do të binte viktimë e grushtave të rëndë të Listonit, deri atëherë kampion bote në peshën e rëndë. Por për 6 raunde me radhë, Clay 22 vjeçar u mbrojt mirë duke iu shmangur goditjeve të kundërshtarit. Listoni, u lodh dhe kur filloi raundi i shtatë, ai nuk u ngrit për të vazhduar ndeshjen. Kjo fitore e bëri Cassus Clayn kampion botëror të boksit në peshën e rëndë. Menjëherë pas titullit, Clay shpalli se kishte ndërruar fenë e ishte bërë mysliman, duke marrë emrin Muhamed Ali.
Më 25 shkurt 1836, Samuel Colt regjistroi shpikjen e tij, revolverin me pesë fishekë. Parimi i funksionimit të pistoletës Colt nuk ishte i ri, por ai ishte më praktik se të gjithë revolverët e deri atëhershëm. Ushtria dhe marina amerikane e përfshiu revolverin Colt në arsenalin e armëve të saj standarte, çka ndikoi që kjo armë të përdorej edhe nga njësitë e tjera të ushtrisë. Uzina e armëve Colt në Paterson të shtetit New Jersey prodhoi mijëra pistoleta të tilla deri në vitin 1841, kur doli varianti i dytë Walter Colt, pistoletë më e madhe me fishekë të kalibrit 0 presje 45 milimetra. Pistoleta e re Walter Colt me peshë rreth 1 kilogram dhe grykën e gjatë 23 centimetra, thuhej se i ngjante një topi artilerie.