Parlamenti i Rusisë miratoi me shumicë dërrmuese votash emërimin e Mihail Fradkovit, në postin e kryeministrit, nëntë ditë para zgjedhjeve presidenciale.
Dhoma e ulët e Parlamentit rus, Duma votoi me 352 vota pro dhe 58 kundër në favor të zotit Fradkov. 24 ligjvënës abstenuan.
Zoti Fradkov u zotua se do të luftojë korrupsionin dhe do të zbatojë reforma në sistemin e taksave. Ai tha gjithashtu se do të ketë vetëm një zëvendës-kryeministër dhe jo gjashtë, sa kishte paraardhësi i tij Mikhail Kasyanov.
Presidenti Putin e emëroi zotin Fradkov të hënën, gjashtë ditë pasi shkarkoi nga detyra kryeministrin Kasyanov dhe gjithë kabinetin e tij. Ndërkohë, një nga kandidatët për president, Ivan Ribkin, i cilësoi zgjedhjet si farsë dhe tha se po tërhiqej nga gara.// lk //