Kandidati demokrat për president John Kerry e kritikoi presidentin Bush se nuk ka ndërmarrë veprime të menjëhershme pasi e vunë në dijeni për sulmet terroriste të 11 shtatorit.
Presidenti Bush ndodhej në Florida, ku po u lexonte fëmijëve të shkollave në momentin kur ndodhën sulmet. Një ndihmës e informoi presidentin Bush për sulmet, por vazhdoi t’u lexonte fëmijëve për 7 minuta të tjera dhe pastaj u kërkoi atyre falje për t’u larguar.
Zoti Kerry tha sot në një konferencë shtypi në Washington, se në se ai do kishte qenë president, do të ishte larguar menjëherë, duke u thënë me mirësjellje fëmijëve se i duhej të shkonte me urgjencë diku.
Senatori i Massachusetsit po vazhdon një fushatë elektorale dy-javore. Sot ai shkon në shtetin e Missourit.