Luftimet mes rebelëve shiit dhe forcave amerikane vazhduan sot për të tretën ditë në lagjen Sadr të Bagdadit.
Banorët thonë se të paktën katër persona u vranë dhe disa të tjerë u plagosën gjatë përplasjeve të fundit. Forcat amerikane zhvilluan operacione në pjesën e mbajtur nga shiit-ët për të ushtruar presion ndaj milicisë së klerikut radikal Moqtada al-Sadr dhe për t’i çarmatosur dhe shpërbërë ata.
Më në veri të vendit, në Mosul, një zyrtar i dytë nga kompania shtetërore North Oil u vra brenda më pak se një jave. Ushtria amerikane njoftoi sot se një marins u vra gjatë luftimeve të mërkurën, në perëndim të Bagdadit, në provincën e paqendrueshme të al-Anbar-it.
Shefi i komandës qendrore amerikane, gjenerali John Abizaid tha se më shumë irakianë dhe ndoshta trupa ndërkombëtare do të jenë të nevojshme për të siguruar zgjedhjet kombëtare të planifikuara për në janar.