Presidenti Bush dhe rivali i tij demokrat John Kerry bënë komente lidhur me video-kasetën e re të publikuar nga udhëheqësi i al-Kaidës Osama bin Laden. Të dy kandidatët presidencialë u zotuan se do të mposhtin terrorizmin.
Zoti Bush zhvilloi të shtunën një video-konferencë me qark të mbyllur me zyrtarët e tij të lartë të sigurimit, ku i udhëzoi të ndërmarrin të gjitha masat e nevojshme në përgjigje të komenteve në kasetë.
Senatori Keri tha se amerikanët janë të bashkuar në vendosmërinë e tyre për të ndjekur dhe asgjësuar bin Ladenin dhe terroristë të tjerë.
Në videon e re, bin Ladeni bëri komentet më të qarta që flasin për lidhjen e tij me sulmet terroriste të 11 shtatorit ndaj New Yorkut dhe Washingtonit. Ai tha se mënyra për të shmangur një tjetër incident si ai i Manhatanit është duke parandaluar kërcënimin amerikan ndaj sigurisë së myslimanëve.