Gjatë vitit të kaluar në Maqedoni nuk kanë ekzistuar kushte për praktikimin dhe mbrojtjen e të drejtave themelore dhe lirive të njeriut në nivelin e shteteve demokratike evropiane, ndërsa shteti në shumë raste edhe vetë i ka shkelur dhe rrezikuar të drejtat e qytetarëve të vet.
Ky vlerësim është dhënë në një raport të Komitetit të Helsinkit për të Drejtat dhe Liritë e Njeriut në Maqedoni.
Sipas raportit vjetor të Komitetit të Helsinkit, Maqedonia është në rrugën e shndërrimit në një vend ku nuk respektohen liritë dhe të drejtat themelore të njeriut.
Kjo organizatë paralajmëron qeverinë se ajo vazhdimisht po rrezikon të drejtat e qytetarëve. Në bazë të raportit, qytetarët janë të diskriminuar në mbrojtjen e të drejtave të tyre në sferën sociale dhe ekonomike.
Komiteti i Helsinkut vlerëson se fuqia e pushtetit zbatohet nga partitë politike dhe jo nga strukturat legjitime institucionale.
Komiteti vlerëson se policia në Maqedoni është e papërgjegjshme dhe në shumë raste ka ushtruar dhunë dhe torturë, ndërkaq sistemi i drejtësisë është joefikase dhe e korruptuar.
Në raport më tej theksohet se shumica e qytetarëve sidomos gjatë vitit të kaluar janë paraburgosur në mënyrë të paligjshme nga ana e organeve zyrtare.
Po ashtu thuhet se Avokati i Popullit si institucion më i fuqishëm për drejtat e njeriut është vënë nën mbikqyrjen e partive politike.
“Në Maqedoni miratohen ligje dhe më pastaj ato nuk respektohen ose nuk zbatohen në praktikë nga ana e institucioneve”, theskohet më tej në raportin e Komitetit të Helsinkut për të drejtat dhe liritë e njeriut”.
Kjo organizatë paralajmëron se Qeveria nuk tregon sinjale për përmirësimin e gjendjes së të drejtave të njeriut.