Të paktën dy sulmues vetëvrasës të armatosur rëndë, sulmuan një xhami shiite në Afganistanin perëndimor, duke vrarë të paktën 29 veta dhe plagosur rreth 60 të tjerë.
Sulmi u krye të martën mbrëma në qytetin Herat në kufi me Iranin.
Mjekët i thanë Zërit të Amerikës se numri i viktimave mund të rritet.
Mediet afgane cituan zyrtarët lokalë të kenë thënë se incidenti filloi kur një sulmues vetëvrasës e hodhi vetën në erë në hyrje të xhamisë, ndërsa tjetri hyri në ndërtesë duke hapur zjarr.
Banorët thanë se të paktën 1 mijë veta ishin në xhami në një ceremoni fetare.
Ende askush nuk e ka marrë përgjegjësinë.
Grupi militant, Shteti Islamik, kishte marrë përsipër përgjegjësinë për sulmet e mëhershme në tempujt fetar shiit dhe tubimet e tyre në Afganistan. Sulmi i së martës ndodhi një ditë pasi që katër sulmues vetëvrasës sulmuan ambasadën e Irakut në Kabul.
IS-i mori përgjegjësinë për dhunën e së martës gjatë të cilës sipas autoriteteve afgane, u plagosën 6 persona.
Përleshja gati katërorëshe e së hënës mori fund pasi që forcat afgane vranë tre nga sulmuesit. I katërti hodhi vetën ne erë në fillim të sulmit.
Ambasadori irakian dhe personeli tjetër diplomatik u shpëtuan.
Facebook Forum