Forcat e sigurisë në Siri kanë intensifikuar fushatën vdekjeprurëse në qytetin port të Latakias sot ku ushtria po godet qytetin port nga toka dhe deti.
Aktivistët dhe dëshmitarët thanë se anije luftarake filluan të godisnin zonën bregdetare të qytetit sot, një ditë pasi aty hynë tanket. Ta thanë se të paktën 22 persona janë vrarë nga forcat e sigurisë gjatë dy ditëve të fundit. Operacionet e qeverisë vijnë pasi protestuesit u grumbulluan në Latakia dhe qytete të tjera të premten duke bërë përsëri thirrje për dorëheqjen e presidentit Bashar al Assad.
Në një sulm tjetër që u zhvillua dje në rajonin Kusair, pranë kufirit libanez, aktivistët thanë se u vra të paktën një person.