Lidhje

Izraeli tërhiqet nga negociatat për armëpushim


Izraeli ka vendosur të mos dërgojë negociatorë në Kajro për bisedimet e planifikuara me palestinezët, një ditë pasi e akuzoi Hamasin për shkeljen e një armëpushimi që duhet të vazhdonte 72-orë.

Kryenegociatori palestinez Saeb Erekat tha se një delegacion palestinez do të jetë në Kajro për bisedime. Por agjencia e lajmeve Reuters citon një zyrtar i izraelit, sipas të cilit të dërguarit izraelitë nuk do të marrin pjesë. Zyrtari akuzoi Hamasin për mashtrim të ndërmjetësve ndërkombëtarë.

Armëpushimi i planifikuar u prish dje rreth një orë pasi kishte filluar. Izraeli akuzoi Hamasin për vrasjen e dy ushtarëve izraelitë dhe kapjen e një tjetri gjatë një prite.

Izraeli bombardoi sot qytetin Rafah të Gazës, ndërsa vazhdonte kërkimin për ushtarin e humbur.

Zyrtarët palestinezë të shëndetësisë thonë se të paktën 35 njerëz janë vrarë nga bombardimet në Rafah, ndërsa sulmet e reja ajrore në pika të ndryshme të Gazës shkatërruan dhjetra shtëpi. Universiteti Islamik i Gazës u godit rëndë nga sulmet izraelite.

Krahu ushtarak i Hamasit tha se nuk ka dijeni se ku mund të jetë ushtari i zhdukur izraelit, por beson se ai mund të jetë vrarë gjatë një sulmi izraelit, së bashku me luftëtarët e Hamasit të cilët morën pjesë në pritën e së premtes. Hamasi tha në një deklaratë se kishte humbur lidhjet me luftëtarët e tij.

Presidenti amerikan Barak Obama, kreu i Kombeve të Bashkuara Ban Ki-moon dhe të tjerë kanë akuzuar Hamasin për shkeljen e armëpushimit dhe kanë bërë thirrje për lirimin e menjëhershëm dhe pa kushte të ushtarit të zhdukur. Por militantët palestinezë thonë se përplasja ka ndodhur para fillimit të armëpushimit.

Shiko komentet (1)

Ky forum është mbyllur
XS
SM
MD
LG