Në Kosovë, ekspertët e ekonomisë thonë se gjatë vitit ta kaluar, prania e mallrave nga Serbia në tregun e Kosovës arriti vlerën prej mbi 800 milionë euro. Një pjesë e madhe e tyre ka hyrë në treg nëpër rrugë të paligjshme. Kryetari i Odës Ekonomike të Kosovës, Safet Gërxhaliu thotë në një bisedë për Zërin e Amerikës se këto të dhëna dëshmojnë nevojën e institucionalizimit të afarizmit ndërmjet dy vendeve dhe në këtë funksion duhet parë edhe marrëveshjen e mirëkuptimit të nënshkruar ditë më parë me odën ekonomike të Serbisë. Me zotin Gërxhaliu bisedoi korrespondenti ynë në Prishtinë, Leonat Shehu.