Kryeministri i Kosovës, Hashim Thaçi, shkarkoi sot nga detyra, zëvendësministrin e drejtësisë, Ramadan Gashi. Në vendimin e kryeministrit thuhet se shkarkimi është bërë në kuadër të përgjegjësive kushtetuese dhe ligjore, për shkak të aktakuzës së ngritur kundër zotit Gashi nga prokuroria e shtetit.
Zoti Gashi, ish kryetar i komunës së Skenderajt, në Kosovën qendrore, akuzohet për tri vepra penale që kanë të bëjnë me shpërdorimin e detyrës zyrtare gjatë kohës sa ushtronte atë post që nga viti 2000 deri në vitin 2007.
Në postin e zëvendësministrit të drejtësisë ai ishte emëruar pak ditë më parë, duke nxitur reagimin e partive opozitare dhe të shoqërisë civile.