Lidhje

Shtyhet për të mërkurën votimi i marrëveshjes për kufirin me Malin e Zi


Parlamenti i Kosovës diskutoi për më shumë se tetë orë të martën në një seancë të jashtëzakonshme, për ratifikimin e marrëveshjes për shënimin e kufirit me Malin e Zi, më shumë se dy vjet e gjysmë pas nënshkrimit të saj.

Kryeministri i Kosovës, Ramush Haradinaj duke e paraqitur projektligjin për marrëveshjen u bëri thirrje deputetëve që ta votojnë atë duke i siguruar ata se versioni i ri i projektligjit siguron përmirësimin e gabimeve të mundshme dhe Kosova nuk do të jetë humbëse.

“Vota për këtë ligj është votë për shtetin, për perspektivën euro-atlantike dhe lirinë e lëvizjes”, tha kryeministri Haradinaj, partitë e koalicionit qeverisës të të cilit janë zotuar për votimin e saj.

Projektligji mbështetet edhe nga Lidhja Demokratike e Kosovës në opozitë, shefi i grupit parlamentar të së cilës, Avdullah Hoti, e kritikoi kryeministrin Haradinaj për qëndrimin e tij kundër kësaj marrëveshjeje në të kaluarën dhe i bëri thirrje që pas ratifikimit të saj të jap dorëheqje dhe ta çojë vendin në zgjedhje të reja.

Kundër projektligjit është shprehur lëvizja Vetëvendosje, e cila futi në sallën e parlamentit nënshkrimet e peticionit të qytetarëve të Kosovës kundër marrëveshjes që ishte mbështetur dikur edhe nga vet kryeministri Haradinaj, derisa ishte në opozitë.

Kundër është shprehur edhe grupi i deputetëve të pavarur i përbërë nga ish deputetët e lëvizjes Vetëvendosje që u ndanë prej saj. Lista serbe ndërkaq është shprehur e pa interesuar për t'u bërë pjesë e votimit për marrëveshjen.

Marrëveshja për kufirin me Malin e Zi, kishte ndarë skenën politike në vend për gati tre vjet.

E nënshkruar në fund të gushtit të vitit 2015, ajo është ratifikuar nga parlamenti i Malit të Zi, por nuk është ratifikuar nga Kosova për shkak të mospajtimeve që çuan edhe në skena të dhunshme në parlament dhe jashtë tij. Kundërshtarët e marrëveshjes pohojnë se Kosova humb mbi 8 mijë hektarë tokë.

Muajin e kaluar, presidenti i Kosovës, Hashim Thaçi dhe ai i Malit të Zi, Filip Vujanoviç u pajtuan për shqyrtimin e gabimeve të mundshme në marrëveshje, duke rihapur diskutimet për ratifikimin e mundshëm të saj nga parlamenti i Kosovës.

Mos ratifikimi i kësaj marrëveshjeje që është kusht për liberalizimin e vizave ka bërë që qytetarët e Kosovës ende të presin në radhë për viza para ambasadave evropiane, ndërsa është edhe një nga kushtet që Kosova duhet përmbushë drejt rrugës së saj drejt integrimeve evropiane.

Facebook Forum

XS
SM
MD
LG