Lidhje

EULEX-i heton pohimet për korrupsion në radhët e tij


Misioni i BE-së thotë se po heton që nga viti i kaluar dyshimet për korrupsion në radhët e tij. Shoqatat e gazetarëve shprehin shqetësim për trysni ndaj gazetarit që publikoi pohimet

Asociacioni i Gazetarëve të Kosovës, është shprehur i shqetësuar me, siç thuhet trysninë që zyrtarë të misionit të Bashkimit Evropian për sundimin e ligjit, i kanë bërë gazetarit të “Kohës Ditore”, Vehbi Kajtazi, pas publikimit të një serie shkrimesh për përfshirjen e mundshme të zyrtarëve të këtij misioni në korrupsion.

EULEX-i pohon se është duke hetuar dyshimet se zyrtarë të tij mund të kenë marrë para në këmbim të lirimit të disa të akuzuarve për vepra penale, por nuk pranon të komentojë për hetimet e as dokumentet që kanë rrjedhur dhe janë botuar në Koha Ditore.

Autori Kajtazi pohon se është ushtruar trysni ndaj tij për të mos botuar dokumentet për të cilat zyrtarë të EULEX-it besojnë se kanë rrjedhur nga prokurorja britanike e këtij misioni Maria Bamieh, e cila është pezulluar nga puna.

Në Bruksel, zyrtarët e Bashkimit Evropian thonë se po i shqyrtojnë seriozisht të gjitha dyshimet e hedhura mbi personelin e këtij misioni, që gëzon ndërkaq imunitet kundruall sistemit vendës të drejtësisë.

Në një komunikatë të zyrës së përfaqësueses së Bashkimit Evropian për politikë të jashtme dhe siguri thuhet se “që nga viti 2013, autoritetet gjyqësore të EULEX-it dhe të Kosovës janë duke kryer një hetim të përbashkët lidhur me këto pohime. Një analizë e thellë është zbatuar në përputhje me atë që është në thelb të përpjekjeve të EULEX-it, lufta kundër korrupsionit dhe pandëshkueshmërisë”.

Në komunikatë thuhet se pavarësisht rrjedhës së hetimeve, mos paragjykimi i fajësisë përbën një gur themeli për sistemin e sundimit të ligjit.

Duke ritheksuar mbështetjen e plotë për shefin e sapoemëruar të EULEX-it dhe ekipin e tij, në komunikatë shprehet besimi se “ata do të vazhdojnë të zbatojnë me sukses mandatin e misionit dhe të ndihmojnë autoritetet e Kosovës në konsolidimin e sundimit të qëndrueshëm dhe të përgjegjshëm të sektorit të ligjit në Kosovë, të lirë nga ndërhyrjet politike”.

Misioni i EULEX-it, u vendos në Kosovë pas shpalljes së pavarësisë së saj nga Serbia në shkurt të vitit 2008. Misioni ruan ende fuqi ekzekutive dhe trajton rastet e krimeve te luftës por edhe krimin e organizuar dhe korrupsionin në rastet që vlerësohen me të ndjeshme për t’u trajtuar nga prokurorët dhe gjykatësit vendas.

XS
SM
MD
LG