Qeveria e Kosovës miratoi të martën vendimin për t’u vënë taksa shtesë prodhimeve nga Serbia, si kundërvënie ndaj fushatës së Beogradit për të penguar anëtarësimin e Kosovës në organizatat ndërkombëtare por edhe siç thuhet përzierjes së saj në punët e brendshme të Kosovës.
Sipas qeverisë taksa shtesë prej 10 për qind përfshinë mallrat që importohen në Kosovë nga Serbia por edhe nga Bosnja e Hercegovina, e cila nën trysninë e entitetit serb, vazhdon të kundërshtojë pavarësinë e Kosovës.
Kosova importon mallra nga Serbia me vlerë prej mbi 400 milionë eurosh.
Zyrtarë të qeverisë thanë se ajo po i përdorë paratë e fituara në Kosovë për të dëmtuar shtetësinë e saj.
Zëvendëskryeministri i Kosovës, Enver Hoxhaj, shkroi në twitter se “nuk ka normalizim të marrëdhënieve me Serbinë nëse ajo vazhdon fushatën e saj agresive kundër Kosovës. Masat ekonomike janë vetëm hapi i parë. Nëse Bashkimi Evropian nuk shfrytëzon ndikimin për t’u dhënë fund veprimeve destruktive të Serbisë, ne jemi të detyruar të veprojmë vet”, shkroi ai.
Beogradi është përfshirë në një proces bisedimesh për normalizimin e marrëdhënieve me Kosovën, që është kusht për integrimet evropiane, ndonëse kundërshton pavarësinë e saj që u shpall në shkurt të vitit me mbështetjen e Shteteve të Bashkuara dhe vendeve kryesore të Bashkimit Evropian.
Diplomacia serbe pohon se është duke ulur numrin e vendeve që e kanë njohur pavarësinë e Kosovës dhe është duke punuar që të pengojë anëtarësimin e saj në organizata ndërkombëtare. Shefi i diplomacisë serbe, Ivica Daçiç, tha se po punohet shumë për te penguar anëtarësimin e Kosovës në organizatën ndërkombëtare të policisë, INTERPOL, në takimin e kësaj organizate që mbahet këtë muaj në Dubai.
Presidentët e të dyja vendeve, thuhet se mund të takohen në Bruksel gjatë ditëve në vazhdim në një raund të ri bisedimesh, në kërkim të një marrëveshjeje për normalizimin e marrëdhënieve në dritën e ideve të muajve të fundit që përfshijnë edhe ndryshimin e mundshëm të kufijve.
BE-ja kërkon shpjegime nga Kosova
Bashkimi Evropian kërkoi nga Kosova sqarime urgjente mbi vendimin për taksat ndaj mallrave nga Serbia dhe Bosnja.
“Këto masa janë një shkelje e qartë e detyrimeve të Kosovës sipas CEFTA-s, (marrëveshjes për tregti të lirë në Evropën Qendrore). Bashkimi Evropian pret që Kosova, e cila aktualisht është kryesuese e CEFTA-s të përmbushë plotësisht detyrimet dhe të tërheqë masat e vendosura”, tha të mërkurën Maja Kocijançiç, zëdhënëse e shefes së politikës së jashtme të BE-së, Federica Mogherini.
Marrëveshja CEFTA është një projekt ndërkombëtar i krijuar nga ana e Bashkimit Evropian, me qëllim të lehtësimit të këmbimeve tregtare të vendeve të Ballkanit Perëndimor dhe Kosova është anëtare e kësaj marrëveshjeje që nga viti 2007.
Facebook Forum