Në Shkodër, u zhvillua sot konferenca kushtuar fuqizimit të strukturave të emergjencave civile, në funksion të ndihmës ndaj komuniteteve të rrezikuara.
Drejtori i Emergjencave Civile të Shqipërisë, Alfred Olli, tha për Zërin e Amerikës se, ditët e fundit, për shkak të reshjeve të dëborës dhe ngricave, është vërejtur një situatë problematike në disa qarqe të vendit.
Zoti Olli tha se situatat emergjente, të krijuara gjatë dy viteve të fundit në rajonin e Shkodrës, për shkak të përmbytjeve masive, dëshmojnë për nevojën e fuqizimit të strukturave të emergjenceve civile, gjë që sipas tij, po realizohet në bashkëpunim me Bankën Botërore.