Në Kosovë, presidentja Atifete Jahjaga tha se autoritetet duhet të bëjnë gjithë çfarë është e mundur që të mos lejohet stigmatizimi i mëtejmë i viktimave të përdhunimeve gjatë luftës. Gjatë diskutimeve në Këshillin Kombëtar për të mbijetuarit e dhunës seksuale gjatë luftës, ajo tha se Kosova është pjesë e hartimit të dokumenteve ndërkombëtare që synojnë mbledhjen e dëshmive dhe nxjerrjen para drejtësisë të kryesve të përdhunimeve. Pesëmbëdhjetë vjet pas luftës ende nuk dihet numri i saktë i grave dhe vajzave që ishin viktimë e këtyre krimeve, dhe sipas autoriteteve, frika nga stigmatizimi mund të bëjë që ky numër të mos merret vesh asnjëherë. Nga Prishtina njofton korrespondenti ynë, Leonat Shehu.