Lidhje

Takim dy ditor i Natos


Ministrat e jashtëm të Natos po zhvillojnë një takim dy ditor në Bruksel, ndërsa gjendja e sigurisë në rajone të ndryshme të botës është përkeqësuar, apo siç u shpreh Sekretari i Përgjithshëm i aleancës “takimi zhvillohet në një mjedis të errët të sigurie”. Ndërkohë nesër, aleanca pritet t’i ofrojë Malit të Zi ftesën e anëtarësimit.

Sekretari amerikan i Shtetit John Kerry, Ministri i Jashtëm turk Mevlut Cavusoglu dhe Ministri i Jashtëm britanik Philip Hammond janë mes atyre që po marrin pjesë në takimin dy-ditor në Bruksel që do të përqëndrohet tek Afganistani dhe strategjia e sigurisë në Lindjen e Mesme.

"Mjedisi i sigurisë në të cilin takohemi sot është i errët: sulme terroriste, paqëndrueshmëri e dhunshme, prishje e rregullave ndërkombëtare. Këto janë sfida serioze nga drejtime të ndryshme dhe Nato po përgjigjet. Sot dhe nesër, ne do të marrim hapat e mëtejshëm” tha Sekretari i Përgjithshëm i aleancës Jens Stoltenberg.

Takimi vjen gjashtë ditë pasi Turqia, anëtare e Natos, rrëzoi një avion luftarak rus në incidentin e parë të njohur të këtij lloji që nga Lufta e Ftohtë. Turqia ka mbështetjen e Natos në të drejtën e saj për t’u vetmbrojtur tha zoti Stoltenberg, duke shtuar se vëmendja duhet të përqëndrohet tani në uljen e tensioneve.

"Mendoj se vëmendja tani duhet të jetë tek ulja e përshkallëzimit të tensioneve dhe mënyra për të përmirësuar mekanizmat e për të shmangur incidente si ai që pamë javën e kaluar”.

Nesër aleanca pritet t’i ofrojë Malit të Zi ftesën për t’u anëtarësuar në Nato. Zëdhënësja e Departamentit të Shtetit, Elizabeth Trudeau tha se anatërësimi i këtij vendi në NATO do të kontribuojë për të shtuar sigurinë në Ballkan dhe Evropë.

“Ne përshëndesim përparimet që ka arritur qeveria e Malit të Zi dhe ne jemi të përgatitur të mbështesim ftesën e anëtarësimit. Ne besojmë se anëtarësimi i Malit të Zi në NATO, do të ndihmonte për sigurinë në Ballkan dhe Evropë”.

Dhe ndërsa aktivitetet ushtarake të Rusisë nga Balltiku në Lindjen e Mesme po u afrohen gjithnjë e më shumë kufijve të Natos, Sekretari i Përgjithshëm i alancës Stoltenberg bëri thirrje për procedura të reja komunikimi me Moskën për të shmangur aksidentet, si nga bombardimet në Siri, apo gjatë stërvitjeve ushtarake të kryera nga Rusia dhe Nato.

XS
SM
MD
LG