Presidenti amerikan Barack Obama tha sot se do të vizitojë Hiroshimën këtë muaj, duke u bërë udhëheqësi i parë amerikan që shkon në qytetin japonez ku një avion luftarak amerikan hodhi bombën e parë atomike në vitin 1945, në fund të Luftës së Dytë Botërore, duke shkaktuar vdekjen e dhjetra mijëra njerëzve.
Për shtatë dekada, presidentët amerikane kanë shmangur një vizitë në Hiroshima, mesa duket për të mos krijuar përshtypjen se një vizitë e tillë do të shihej si një ndjesë për shkatërrimin e shkaktuar nga shpërthimi atomik atje dhe në Nagasaki, ku një bombë e dytë atomike u lëshua tri ditë më pas.
Zoti Obama shkon në Japoni nga 21-28 maj për një takim të udhëheqësve të Grupit të Shtatë ekonomive më të mëdha të botës. Shtëpia e Bardhë tha se ai do ta vizitojë Hiroshimën së bashku me kryeministrin Shinzo Abe.