Një thikë që sipas njoftimeve është gjetur para shumë vitesh në shtëpinë e ish-yllit të futbollit amerikan dhe ish-të dyshuarit për vrasje O.J. Simpson, mund të jetë një armë e përdorur në rastin e vrasjes së dyfishtë që përfshiu vendin.
Sipas faqes së internetit TMZ, që njoftoi e para për këtë lajm, thika ishte zbuluar në vitin 1998 e groposur në ish-pronën e Simpsonit nga një punëtor ndërtimi, që po ndihmonte me shkatërrimin e pronës.
TMZ njofton se punëtori ia dha thikën një oficeri policie që nuk ishte në detyrë në atë moment dhe që nuk ia dorëzoi kurrë thikën autoriteteve.
Pasi doli në pension, oficeri njoftohet se ia përmendi thikën një kolegu. Ai person ia dha informacionin eprorëve që kërkuan që oficeri të dorëzonte thikën.
Sipas TMZ-së, thika ka gjurmë gjaku dhe tani po i bëhet analiza për ADN-në dhe gjurmë të tjera nga policia e Los Angelesit.
