Parlamenti serb miraton një rezolutë për më shumë dialog me Kosovën

Parlamenti serb ka miratuar një rezolutë që bën thirrje për më shumë dialog me Kosovën për të arritur kompromis rreth një mosmarrëveshje tregtare që u shkallëzua në dhunë vdekjeprurëse javën e kaluar.

Ligjvënësit serbë miratuan rezolutën herët të dielën, me një shumicë prej 181 votash në asamblenë prej 250 anëtarësh.

Dhuna shpërtheu e hënë javën e kaluar, kur forcat speciale të qeverisë së Kosovës konfiskuan dy vendkalime kufitare në veri të vendit për të zbatuar një masë për ndalimin e importeve nga Serbia. Qeveria e Kosovës e kishte vendosur këtë embargo këtë muaj në kundërpërgjigje të masës së Serbisë për ndalimin e importeve nga Kosova.

Në veri të Kosovës, banorët serbë u ballafaquan me forcat e rendit, duke nxitur një shkëmbim zjarri që vrau një polic shqiptar dhe plagosi disa njerëz të tjerë. Paqeruajtësit e NATO-s ndërhynë, duke marrë kontrollin e dy pikave kufitare të enjten sipas një marrëveshjeje me qeverinë e Kosovës, e cila tërhoqi prej andej forcat speciale të policisë.

Presidenti serb Boris Tadiç tha të dielën se ai beson se sekuestrimit i shkurtër i vendkalimeve kufitare nga ana e qeverisë së Kosovës është pjesë e një skeme për të ndryshuar balancën demografike në veri të Kosovës. Kryeministri i Kosovës Hashim Thaçi akuzon Beogradin për organizimin e dhunës.

Në fjalën e tij drejtuar ligjvënësve serbe, zoti Tadiç tha se Beogradi nuk do të bëjë luftë në përgjigje ndaj trazirave dhe se beson që paqja është alternativa e vetme. Ai tha se luftërat e mëparshme në ish-Jugosllavi në vitet 1990 shkaktuan qindra e mijëra të vrarë.

Shpërthimi i dhunës në veri të Kosovës është një nga më seriozet në rajon që nga viti 2008 kur Kosova u shpall shtet i pavarur.