Patogjenet rezistente ndaj antibiotikëve janë një nga shqetësimet më të rënda për shëndetin. Shumë faktorë po shkaktojnë shtimin e rasteve, përfshirë mjekët që shkruajnë receta të tepërta për antibiotikë dhe pacientët që i keqpërdorin ato. Mirëpo organizata të shëndetit publik thonë se përdorimi i tepruar i antibiotikëve te gjedhët e shëndosha është po ashtu faktor. Fermerët i kundërvihen këtij pohimi, por zyrtarë e shëndetësisë në Shtetet e Bashkuara tani thonë se ka prova të qarta. Dhe duke i dhënë fund shembullit të ndjekur nga administratat e mëparshme, zyrtarët po rekomandojnë ndërprerjen e praktikës.
Gati në të gjitha vendet e botës që merren me blegtori, blegtorët shtojnë një sasi të vogël antibiotikësh në ushqimin për kafshët. Antibiotikët i mbajnë ato të shëndosha dhe i ndihmojnë që të rriten më mirë.
Organizatat e shëndetit publik kanë kundërshtuar praktikën, sepse bakteriet, që vazhdimisht eskpozohen ndaj antibiotikëve, do të përftojnë ndërkohë rezistencë ndaj tyre. Por sektori i blegtorisë thotë se antibiotikët e përdorur janë shumë larg ushqimit që hanë njerëzit dhe nuk ka prova se ushqyerja e gjedhëve të shëndosha meantibiotikë po dëmton njerëzit.
Në një seancë dëgjimore në Kongres në Uashington, D.C., ditët e fundit, zyrtarët amerikanë nuk ishin të të njëjtit mendim. Ali Khan është zëvendësdrejtor i Qendrave për Kontrollin dhe Parandalimin e Sëmundjeve.
“Ka prova të qarta dhe ka lidhje mes përdorimit të antibiotikëve në gjedhë dhe bartjes së bakterieve që u rezistojnë antibiotikëve dhe që kanë pasoja të dëmshme tek njerëzit”.
Zoti Khan vë në pah disa studime shkencore nga Evropa, Kanadaja dhe Shtetet e Bashkuara, si dhe raportet nga Organizata Botërore e Shëndetit dhe Institutit Amerikan i Mjekësisë, që dëshmojnë të gjitha lidhjen mes përdorimit të antibiotikëve në veterinari dhe shtimit të rrezikut për patogjenë rezistentë ndaj ilaçeve në mesin e njerëzve.
Joshua Sharfstein (SHARF-steen) është zëvendëskomisioner i parë i Administratës Amerikane të Ushqimit dhe Ilaçeve, FDA. Në të njëjtën seancë dëgjimore, ai tha se njëri nga studimet më të mira përdori analizat molekulare për të identifikuar përhapjen e bakterieve rezistente.
“Mund të ndiqen bakterie të caktuara dhe zbulohet se llojet rezistente në njerëz kanë po atë përmbajtje gjenetike si llojet rezistente te kafshët”.
Këto deklarata të ashpra që i kundërvihen praktikës aktuale përfaqësojnë qëndrimin e ri të qeverisë amerikane ndaj kësaj çështjeje. FDA botoi udhëzime të reja për blegtorinë, duke rekomanduar që të ndalohet përdorimi i antiobiotikëve si nxitës për rritjen e kafshëve.
Jorgen Schlundt (YOR-gen SHLUNT), kreu i dikasterit sanitar për ushqimin në Organizatën Botërore të Shëndetësisë, thotë se po bëhet përpjekja e duhur.
“Kjo është ngjarje shumë e rëndësishme. Po ndiqen udhëzimet që OBSH-ja ka dhënë, duke sugjeruar që të ndalohet përdorimi i antibiotikëve në mbarështimin e gjedhëve”.
Deri tani, vetëm Bashkimi Evropian ka zbatur rekomandimet e OBSH-së, duke ndaluar praktikën në vitin 2006. Zoti Schlundt thotë se praktika vazhdon akoma në vende të tjera të rëndësishme në prodhimet blegtorale. Ndërsa udhëzimet e Agjencisë Amerikane për Ilaçet dhe Ushqimin shihen si hap në drejtimin e duhur, zbatimi i tyre bëhet vullnetarisht. Kritikët thonë se kjo nuk është e mjaftueshme. Dhe zoti Schlundt thotë se mbase kanë të drejtë.
“Nga përvoja jonë, ka gjasa që imponimi ligjor të jetë i nevojshëm për çështje si kjo”.
Por të tjerët thonë se detyrimi ligjor do të ishte i gabuar. Organizata blegtore dhe shoqata më e madhe e veterinarëve të vendit thonë se antibiotikët po ndihmojnë në parandalimin e sëmundjeve të kafshëve, gjë që e bën furnizimin me ushqim më të sigurt. Randall Singer është profesor i epidemiologjisë në Universitetin e Minesotës. Pas seancës dëgjimore, ai tha se ndalimi i antibiotikëve mund të sillte më shumë dëm sesa dobi.
“Në Shtetet e Bashkuara, po të mos i përdornim këta antibiotikë për parandalimin e sëmundjeve, do të përballeshim me sëmundje. Unë kam frikë se, me përhapjen e më shumë sëmundjeve, do të kemi më shumë probleme në furnizimin me ushqim”.
Ali Khan nga Qendrat për Kontrollimin dhe Parandalimin e Sëmundjeve dhe Joshua Sharfstein nga Administrata e Ushqimit dhe Ilaçeve thonë se nuk ka fakte reale për këtë shqetësim.
Kongresi po shqyrton projektligje që do të ndalonin përdorimin e disa antibiotikëve tek gjëja e gjallë. Por po përballet me kundërshtim të ashpër nga ligjvënësit e shteteve blegtore, e madje edhe mbështetësit e projektligjit thonë se ka pak gjasa që ai të miratohet sivjet.