Presidenti Barak Obama filloi sot zyrtarisht fushatën për rizgjedhjen e tij. Tani, u tha presidenti përkrahësve të tij, është koha për të hedhur themelet për fushatën zgjedhore.
Në një deklaratë që bëri sot, zoti Obama tha se është duke plotësuar dokumentacionin e nevojshëm për Komisionin Zgjedhor Federal, që u hap rrugën përpjekjeve për sigurimin e donacioneve.
Ai tha se vendi është duke u përpjekur “për ta mbrojtur përparimin që është bërë” dhe u ka bërë thirrje përkrahësve të ndihmojnë për t’i dhënë formë një fushate, sipas fjalëve të tij, me një frymë më të re se kurrë ndonjëherë.
Presidenti Obama e ka përmirësuar paksa imazhin e tij politik që nga nëntori i kaluar, kur republikanët siguruan një fitore dërrmuese në zgjedhjet e mesit të mandatit për në Kongres, duke rimarrë kontrollin e Dhomës së Përfaqësuesve dhe duke pakësuar shumicën e demokratëve në Senat.
Presidenti Obama, popullariteti i të cilit ka rënë që nga ardhja në postin e Presidentit, vazhdon të ketë rreth 50 për qind përkrahje nga publiku në shumicën e anketimeve të zhvilluara. Shumica e ekspertëve thonë se zoti Obama ka një avantazh të vogël në garën me rivalin e tij republikan, që ende nuk është përcaktuar se kush do të jetë.
