Presidenti Donald Trump u ka thënë bashkëpunëtorëve se sekretari i tij i shëndetësisë është bërë objekt shpërqendrimi, duke hedhur hije mbi axhendën e tij si president dhe duke minuar premtimin e fushatës për të ''tharë moçalin'' e korrupsionit, njofton agjencia e lajmeve Associated Press që citon persona të cilët kanë dijeni mbi çështjen.
Sekretari i Shëndetësisë dhe Shërbimeve Njerëzore Tom Price vazhdoi të premten përpjekjet për të qëndruar në postin e tij në klimën e pikëpyetjeve që ka ngjallur përdorimi nga ana e tij i fluturimeve private me porosi për punë zyrtare, me një kosto prej disa qindra mijë dollarësh.
Sekretarët e tjerë të kabinetit u përpoqën të shpjegonin fluturimet e tyre me avionë privatë të porositur, ndërkohë që një komision i Kongresit tha se do të vazhdojë hetimin e çështjes së udhëtimeve për zyrtarët e lartë qeveritarë.
Sekretari i Pyjeve, Ryan Zinke i quajti polemikat rreth udhëtimeve paksa të ekzagjeruara, por tha se taksapaguesit kanë të drejtë të dinë mbi shpenzimet e udhëtimit të zyrtarëve.
Tom Price shprehu keqardhje për çështjen dhe të enjten ofroi të dëmshpërblente pjesërisht shpenzimet, por kjo nuk duket se e ka zbutur zemërimin, veçanërisht në Shtëpinë e Bardhë.
Presidenti Trump është thellësisht i irrituar me zotin Price si dhe nga njoftimet që bëjnë fjalë për shpenzimet e udhëtimeve të shtrenjta me avion të sekretarit të shëndetësisë, sipas personave që kanë dijeni me diskutimet private të zotit Trump, të cilët folën në kushte anonimiteti.
Facebook Forum