Lidhje

Trump mbron urdhrin ekzekutiv për kufizime të futjes në SHBA


Presidenti Donald Trump ka vazhduar t’i dalë në mbrojtje urdhrit ekzekutiv për të ndaluar futjen e refugjatëve dhe udhëtarëve nga shtatë vende kryesisht myslimane, ndërkohë që grupe për të drejtat e njeriut janë betuar të vazhdojnë padi ligjore dhe kur në qytete të ndryshme mijëra vetë po zhvillojnë protesta. Demokratët po përgatiten të propozojnë project-ligje për ta bllokuar zbatimin e urdhrit.

Në një seri komentesh në Twitter të hënën, zoti Trump tha se Sekretari i Sigurisë Kombëtare John Kelly i kishte thënë se “çdo gjë po ecën mirë, vetëm me probleme të vogla”.

Ai shtoi se “problemet e mëdha në aeroporte” ishin shkaktuar nga një ndërprerje e funksionimit të kompiuterave që preku kompaninë e fluturimeve Delta, si dhe nga protestuesit dhe nga “lotët” e Senatorit Chuck Schumer.

Zoti Schumer dukej se me zor po i mbante lotët kur i bëri thirrje presidentit të dielën të anulonte urdhrin ekzekutiv.

Pentagoni po harton një listë me emrat e irakianëve të cilët kanë mbështetur personelin amerikan dhe të koalicionit për t’i përjashtuar ata nga vendimi i Presidentit Trump.

Zyrtarët thanë të hënën se lista do të përfshijë ata që kanë demonstruar ndjeshëm angazhimin e tyre në mbështetje të forcave amerikane. Ajo do të përfshijë kategori të tilla si përkthyesit, shoferët dhe forcat irakiane që mund të jenë duke u stërvitur në SHBA.

Reagon ish presidenti Obama

Një zëdhënës i ish-presidentit Barack Obama thotë se zoti Obama “në thelb nuk pajtohet” me diskriminimin që vë në shënjestër njerëzit bazuar në fenë e tyre.

Deklarata nuk e përmend në mënyrë konkrete urdhrin e Presidentit Donald Trump, ndonëse aludon për të.

Shtëpia e Bardhë tha se urdhri në fjalë nuk është ndalim për myslimanët, sepse dhjetëra shtete me shumicë myslimane nuk përfshihen në të.

Zëdhënësi i zotit Obama, Kevin Lewis, thotë se Obama është i inkurajuar nga përmasat e angazhimit që po shihet kudo në vend. Ai i referohej protestave kundër urdhrit të zotit Trump mbi emigracionin dhe refugjatët.

Ndërkohë, një numër në rritje ligjvënësish republikanë kanë shprehur shqetësime në lidhje me urdhrin ekzekutiv të presidentit Trump.

Urdhri, i cili u nënshkrua të premten, përfshin një ndalim 120 ditësh të pranimit të refugjatëve dhe një ndalin 90 ditësh për persona nga Iraku, Irani, Siria, Somalia, Sudani, Libia dhe Jemeni.

Urdhri ekzekutiv dhe aeroportet

Zbatimi i tij është shoqëruar me konfuzion në aeroportet amerikane, ku në disa raste njerëz me statusin e banorët të përhershëm në SHBA janë ndaluar për t’u marrë në pyetje para se t’u lejohej futja në vend.

Sekretari i Sigurisë Kombëtare nxori të dielën një deklaratë ku përpiqet të sqarojë urdhrin, duke thënë se e konsideron “futjen e personave me statusit të banorit të përhershëm si çështje të sigurisë kombëtare”.

Në një deklaratë të veçantë, Departamenti i Sigurisë Kombëtare tha se qeveria ruan të drejtën të anulojë viza në raste të caktuara, nëse është e nevojshme, në të mirë të sigurisë kombëtare.

Këto sqarime pasuan një urdhër nga një gjykatë federale në Nju Jork për të pezulluar përkohësisht deportimin e personave që kishin mbërritur në aeroporte amerikane me viza të vlefshme ose të cilëve u ishte miratuar statusi i refugjatit.

Urdhri i gjykatëses

Në orët e vona të ditës së dielës, Gjykatësja Ann Donnelly, e distriktit të Nju Jorkut, lëshoi një urdhër emergjence që bllokon përkohësisht deportimin e personave që janë ndaluar pasi kanë mbërritur në aeroportet amerikane me viza të rregullta. Urdhëri gjithashtu nuk lejon ndalimin e refugjatëve që kanë aplikuar tashmë.

Gjykatësja Donnelly shprehet në urdhërin e saj se “ekziston rreziku që, edhe pa deportimin, të shkaktohen dëme thelbësore dhe të pariparueshme ndaj refugjatëve, udhëtarëve me viza, si dhe individëve të tjerë nga kombe të tjera” që bëhen subjekt i urdhërit të Presidentit.

“Mesazhi është i thjeshtë. Kjo është krejtësisht anti-amerikane. Ky është një urdhër i paligjshëm dhe nuk po i bën më të sigurta komunitetet tona, por po i rrezikon ato. Këta janë individë që e bëjnë vendin tonë madhështor. Dy personat për të cilët parashtruam padinë gjyqësore janë njerëz që kanë ndihmuar SHBA-në në vende të tjera. Këto janë vlerat që ne duhet të vlerësojmë si Amerikë”, tha Andre Segura, i Bashkimit Amerikan të Lirive Civile.

Të dielën. Boris Epshteyn, një zëdhënës i Presidentit Trump, u tha gazetarëve në një emision të televizionit Fox, se urdhri i gjykatës nuk e bllokon “aspak” urdhrin ekzekutiv.

Zoti Epshteyn tha se urdhri ekzekutiv garanton që të zbatohen ligjet aktuale.

“Ata që kanë karta të gjelbra, nëse janë jashtë Shteteve të Bashkuara në një nga ato shtatë vende – po e theksoj që bëhet fjalë vetëm për ato shtatë vende – ata janë në gjendje të kthehen nëse kalojnë përmes një kontrolli të hollësishëm për t’u siguruar se nuk përbëjnë kërcënim për sigurinë”, tha ai.

Në një deklaratë që nxorri sot Departamenti i Sigurisë Kombëtare, thuhej se kjo agjenci do ta respektojë vendimin e gjykatës, por më tej shtohej se “do të zbatojë gjithashtu “urdhrin ekzekutiv të Presidentit për t’u siguruar që ata që hyjnë në Shtetet e Bashkuara nuk përbëjnë kërcënim për vendin tonë dhe popullin amerikan”.

Presidenti Trump e vë theksin tek “kontrolli i hollësishëm”

Presidenti Trump mohoi se urdhri i tij mund shihet si një masë kundër myslimanëve dhe tha se masat “shumë të rrepta” që ai ka urdhëruar po funksiononte “shumë mire”.

Në llogarinë e tij në Twitter, zoti Trump shkruante se vendi ka nevojë për “kufij të fortë dhe kontroll të skajshëm, TANI! Shihni se ç’po ndodh në gjithë Evropën dhe në gjithë botën. Një rrëmujë e tmerrshme!”

Sekretari i Shtypit i Shtëpisë së Bardhë, Sean Spicer mbajti qëndrim të prerë lidhur me arsyet për që çuan në nënshkrimin e urdhrit ekzekutiv.

“Për t’u siguruar që njerëzit që po lejojmë të hyjnë në vendin tonë, të vijnë me synime paqësore dhe të mos na shkaktojnë dëm. Ka 46 vende të tjera me popullsi myslimane që nuk janë pjesë e urdhrit ekzekutiv”, tha zoti Spicer në një intervistë për televizionin ABC.

Ai shtoi se rreth 325 mijë vetë mbërritën të shtunën në Shtetet e Bashkuara dhe rreth 100 ishin nga vendet e përfshira në masën ndaluese.

Por sipas njoftimeve nga autoritetet federale, të paktën 170 vetë janë ndaluar që kur Presidenti Trump nënshkroi urdhrin të premten.

Dy ligjvënës republikanë me peshë e kritikuan urdhrin të dielën.

“Është e qartë nga i gjithë konfuzioni në aeroportet në gjithë vendin se urdhri ekzekutiv i Presidentit Trump nuk ishte shqyrtuar me kujdes. Ne jemi veçanërisht të shqetësuar nga njoftimet se ku urdhër hyri në fuqi me pak ose aspak konsultim me Departamentet e Shtetit, Mbrojtjes, Drejtësisë dhe Sigurisë Kombëtare”, shkruajnë në një deklaratë Senatorët John McCain dhe Lindsey Graham.

“Një proces kaq i nxituar rrezikon të sjellë rezultate të dëmshme”, vazhdojnë ata.

Ligjvënës të tjerë po flasin në favor dhe kundër kufizimeve.

Senatori republikan Jeff Flake i Arizonës tha se zoti Trump ka të drejtë të jetë i shqetësuar për sigurinë kombëtare “por është e papranueshme kur edhe ata me banim të përhershëm ndalohen ose kthehen mbrapsht…”

Senatorja demokrate Dianne Feinstein nga Kalifornia, i tha një gazetari se ndalimi është “një veprim i pabesueshëm. Të sigurohesh se një individ është kontrolluar me hollësi është krejtësisht ndryshe se sa të thuash, se pse dikush është nga një vend i veçantë apo ka një fe të caktuar, nuk duhet të lejohet të hyjë në vend”.

Dita e dytë e protestave

Qindra demonstrues u mblodhën të dielën para Shtëpisë së Bardhë, në ditën e dytë të protestave në qytete në gjithë Shtetet e Bashkuara kundër urdhrit ekzekutiv.​

Protesta ka patur edhe në Nju Jork, Los Angeles, Filadelfia, Hjuston, Boston, Louisville dhe Detroit.

Grupe të mëdha protestuesish u mblodhën të shtunën dhe të dielën në disa aeroporte amerikane për të protestuar.

Mendimi juaj

Trego komentet

XS
SM
MD
LG