Lidhje

Presidenti Trump sulmon agjencitë e zbulimit, median


Presidenti amerikan, Donald Trump i doli në mbrojtje këshilltarit të sigurisë kombëtare të shkarkuar këtë javë, duke thënë se Michael Flynn ishte viktimë e rrjedhjeve të paligjshme të informacionit nga ana e komunitetit të inteligjencës, me hollësi nga bisedat e tij me ambasadorin e Rusisë në Uashington.

Duke folur të mërkurën në një konferencë shtypi në Shtëpinë e Bardhë së bashku me kryeministrin izraelit, Benjamin Netanyahu, Presidenti Trump tha se zoti Flynn “u trajtua shumë, shumë keq nga mediat."

Ai nuk përmendi se përse e detyroi zotin Flynn të jepte dorëheqjen për atë që Shtëpia e Bardhë e cilësoi si rënie e besimit të presidentit ndaj ish-gjeneralit.

"Mendoj se ishte vërtet diçka trishtuese që ai u trajtua aq keq", - tha Presidenti. "Mendoj se, përveç kësaj, komuniteti i zbulimit po u jep gjëra gazetave. Është vepër penale. Dhe po vazhdon prej një kohe të gjatë, edhe përpara meje. Por tani po ndodh vërtet,” – tha ai.

PRESIDENTI SULMON MEDIAT

Përpara kësaj, zoti Trump sulmoi njoftimet e medias për lidhje të dyshuara mes tij dhe Rusisë, duke fajësuar komunitetin e zbulimit për ato që i quan rrjedhje të paligjshme informacionesh për agjencitë e medias.

"Skandali i vërtetë këtu është se informacionet sekrete po jepen në mënyrë të paligjshme nga “inteligjenca” si karamele. Është diçka anti-amerikane!" tha zoti Trump.

Në një seri komentesh në Twitter, zoti Trump la të kuptohet se artikujt e lajmeve që japin hollësi për lidhje mes tij, këshilltarëve të fushatës së tij dhe ish këshilltarit të sigurisë kombëtare Michael Flynn nga njëra anë dhe zyrtarëve rusë nga ana tjetër, synojnë të minojnë fitoren e tij në zgjedhjet e nëntorit.

Në një prej komenteve në Twitter, ai shkruante se "Lidhja e palogjikshme me Rusinë është qartësisht një përpjekje për të mbuluar gabimet e mëdha të bëra nga Hillary Clinton gjatë fushatës".

Ai tha se "mediat e lajmeve të rreme po çmenden me teoritë e tyre të konspiracionit dhe urrejtjen e verbër." Zoti Trump tha se dy kanale televizive, MSNBC dhe CNN, nuk "mund të shihen dot", ndërsa e cilësoi një program të kanalit Fox si shumë të mirë.

Në të njëjtën kohë, presidenti pretendon se "informacioni po jepet në mënyrë të paligjshme tek gazetat, sipas tij të dështuara New York Times dhe Washington Post nga komuniteti i zbulimit, Agjencia e Sigurisë Kombëtare dhe Byroja Federale e Hetimeve" ashtu sikurse veprohet në Rusi."

Gazeta Washington Post ishte e para që publikoi javën e kaluar hollësi rreth bisedave telefonike mes zotit Flynn dhe ambasadorit rus në Uashington para se zoti Trump të merrte postin, ndërsa New York Times në një editorial dje tha se kështilltarët dhe ndihmësit e zotit Trump kishin patur kontakte të përsëritura me zyrtarë të lartë rusë gjatë fushatës presidenciale.

LIGJVËNËSIT PROPOZOJNË PROJEKTLIGJ PËR SANKSIONET

Një grup ligjvënësish nga të dyja partitë paraqiti një projektligj për të mos lejuar administratën e Presidentit Trump të shfuqizojë sanksionet ndaj Rusisë pa miratimin e Kongresit.

"Zbulimi kohët e fundit i bisedës sekrete të zotit Flynn me ambasadorin rus mbi temën e sanksioneve, e bën këtë projektligj edhe më të rëndësishëm," tha kongresmeni Adam Schiff, numri dy në Komisionin e Dhomës së Përfaqësuesve për Inteligjencën.

Mendimi juaj

Trego komentet

XS
SM
MD
LG