Presidenti amerikan Donald Trump njoftoi të premten pasdite me Twitter se kishte emëruar sekretarin e Sigurisë Kombëtare gjeneralin në pension John Kelly si shef kabineti të Shtëpisë së Bardhë, në vend të zotit Reince Priebus.
"Jam i kënaqur t'ju informoj se sapo kam emëruar Gjeneralin/ Sekretarin John Kelly si shef kabinetit të Shtëpisë së Bardhë. Ai është një amerikan i shkëlqyer," shkruante Presidenti në Twitter.
Vendimi i presidentit Trump vjen pas disa ditë tensionesh publike mes zotit Priebus dhe drejtorit të ri të komunikimit të Shtëpisë së Bardhë Anthony Scaramucci.
"Reince Priebus është njeri i mirë. Gjeneral Kelly do të bëjë një punë fantastike," tha zoti Trump pasi zbriti nga avioni presidencial.
Pak ditë më parë, zoti Scaramucci ndërmori sulme verbale kundër shefit tashmë të shkarkuar të kabinetit, Priebus, zhvillime që u panë si një luftë e hapur brenda stafit në nivelet më të larta të administratës Trump.
Zoti Kelly njihet për mbështetjen që gëzon nga ligjvënësit e të dyja partive.
Facebook Forum