Një avokat mbrojtës i ushtarit amerikan të akuzuar se i ka dhënë informacione sekrete dhe dokumenta me rëndësi të veçantë faqes së internetit Wikileaks, kërkoi sot që drejtuesi i seancës paraprake të tërhiqet nga çështja.
Qysh në fillimin e seancës dëgjimore për ushtarin Bradley Manning, avokati David Coombs argumentoi se drejtuesi i seancës duhej të tërhiqej nga detyra e caktuar sepse ai në jetën civile punon si prokuror për Departamentin e Drejtësisë. Departamenti amerikan i Drejtësisë po zhvillon hetime të veçanta kundër themeluesit të Wikileaks Julian Assange, i cili supozohet se ka marrë dokumentat sekretë nga ushtari Manning.
Në këtë seancë dëgjimore, e cila po zhvillohet në qytetin Fort Meade të shtetit lindor të Merilendit, do të vendoset nëse kundër ushtarit Manning do të zhvillohet ose jo një gjyq ushtarak.