Publicisti, Veton Surroi, në një intervistë për
Zërin e Amerikës thotë se politika e jashtme e Kosovës në vitin e parë të
pavarësisë së saj ishte e varfër. Ai thekson nevojën e një platforme të
politikës së jashtme që do të duhej të miratohej nga Parlamenti i Kosovës.
Zëri i Amerikës: Zoti Surroi, Klubi për Politikë të Jashtme sot po debaton për periudhën një vjeçare të politikës së jashtme të Kosovës. Si e vlerësoni ju këtë periudhë të politikës së jashtme?
Veton Surroi: Ka qenë bukur e varfër në kuptimin e krijimit të politikës së jashtme kosovare. Kemi pasur fat shumë të mirë se politika jonë e jashtme është udhëhequr jo në Prishtinë, por në Washingtion e në Londër, në kryeqytetet e shteteve që na kanë sponsorizuar pavarësinë, por kjo njëkohësisht nuk do të thotë se mund të mbështetemi gjithmonë që dikush tjetër të na i kryejë punët tona. Është një varfëri e skajshme do të thosha në krijimin e politikës së jashtme, në zbatimin e saj, në institucionalizim e saj dhe të gjitha këto natyrisht se reflektohen në situatën në vend.
Zëri i Amerikës: Kosova deri tash është njohur nga 55 vendeve të botës. A është i mjaftueshëm ky numër i njohjeve në vitin e parë të Kosovës si shtet?Veton Surroi: Absolutisht nuk është, dhe kur përmendëm vitin e kaluar, ne në vitin e kaluar patëm paralajmërime nga zyrtarët e Kosovës se do të ketë më shumë se 100 njohje, ato nuk ndodhën, është në natyrën e bilanceve në çdo shoqëri që të ulen dhe të shihet se pse nuk kanë ndodhur 100 njohje dhe çka mund të bëhet që të ketë Kosova 100 njohje
Zëri i Amerikës: Këto ditë autoritetet në Kosovë kanë intensifikuar takimet me përfaqësues të shteteve që ende nuk e kanë njohur Kosovën. Si e vlerësoni këtë mënyrë të lobimit që institucionet e Kosovës po bëjnë?
Veton Surroi: Më duket se është shumë i varfër, improvizues, në masë të madhe është vlerësues. Nuk kam besuar se do të vijë një kohë e këtillë kur pas një viti do t'i bie ndërmend presidentit që të trokas nëpër dyert e ambasadave, kjo është një punë e ambasadorëve të Kosovës, jo e presidentit të Kosovës. Në këtë një vit oscilimet kanë qenë aq të mëdha, nga refuzimi për lobim e deri te kjo formë e lobimit aspak e hijshme.
Zëri i Amerikës: Zoti Surroi, ju keni qenë vazhdimisht kritik ndaj politikës së jashtme të Kosovës. Keni ju ndonjë strategji tjetër që duhet të ndiqet për të shtuar numrin e njohjeve?
Veton Surroi: Ne që vitin e kaluar, në një debat në Klubin për politikë të Jashtme, kemi pasur disa rekomandime, njëri prej rekomandimeve bazike i cili ende vlen është se Parlamenti i Kosovës duhet të miratojë një platformë të vetën të politikës së jashtme. Çdo shtet e ka platformën e vet të politikës së jashtme. Kosova është i vetmi vend i cili nuk e ka as idenë bazike se ku e ka politikën e vet të jashtme.
Zëri i Amerikës: Zoti Surroi, një vit pas pavarësisë, institucionet e Kosovës ende nuk kanë arritur të shtrijnë autoritetin e tyre në tërë vendin. Si i shihni ju zhvillimet në pjesën veriore të Kosovës dhe si të zgjidhet kjo çështje?
Veton Surroi: Unë mendoj se me mënyrën sesi qeveriset Kosova, jo për një vit por as për shumë vjet nuk mund të shtrihet autoriteti i institucioneve kosovare, i rendit dhe ligjit kosovar. Është mungesë e plotë jo vetëm e vullnetit dhe vizionit, por një mungesë bazike shtetformuese në veprimin e institucioneve të Kosovës.Zëri i Amerikës: Cila do të mund të ishte një zgjidhje më konkrete?
Veton Surroi: Një zgjidhje konkrete nuk jepet me një fjali, por ajo jepet me një seri veprimesh të bashkërenduara me bashkësinë ndërkombëtare dhe, si çdo gjë tjetër edhe veprimi shtetndërtues kërkon një program, një platformë të përkrahur, të aprovuar. Në rastin e Kosovës, vendi do të duhej të kishte, që vitin e kaluar, në formë të qartë para Kuvendit të vet, hapat që do të ndërmerren me afatet dhe me parimet të cilat janë të matshme në veprime. //ad//