Kreu i ekzekutivit të Bashkimit Evropian tha sot se bisedimet mes Greqisë dhe kreditorëve evropianë mbi planet e vendit për reforma po zgjasin shumë. Ndërkohë guvernatori i bankës qëndrore greke tha sot pasiguria rrezikon ta dëmtojë më tej ekonominë.
Në një konferencë shtypi me kryeministrin grek Alexis Tsipras në Bruksel, presidenti i Komisionit të BE-së Jean-Claude Juncker tha se nuk është bërë përparim i mjaftueshëm.
"Nuk jam i kënaqur me zhvillimet e javëve të fundit. Nuk mendoj se është bërë përparim i mjaftueshëm, por ne do të përpiqemi të ecim në drejtimin të një përfundimi të suksesshëm për çështjet që duhet të zgjidhim".
Kreditorët e Greqisë në 19 vendet e eurozonës ranë dakord muajin e kaluar të zgjasin programin e shpëtimit të vendit me katër muaj me kusht që paketa e reformave të qeverisë të konsiderohej e pranueshme.
Greqia është varur tek 240 miliardë eurot e paketës së shpëtimit për të përmbushur detyrimet e saj debitore që nga viti 2010 dhe për të mënjanuar falimentimin.
Megjithatë, paratë e shpëtimit kanë ardhur me një sërë kushtesh: qeveritë pasuese kanë vendosur masa shtrënguese dhe reforma ekonomike për të marrë fondet.
Komentet e zotit Juncker vijnë dy ditë pas fillimit të bisedimeve teknike mes mbikëqyrësve të borxhit dhe Greqisë që synojnë shqyrtimin e reformave në më shumë detaje dhe nëse e gjithë paketa është e qëndrueshme.
Gjatë konferencës për shtyp me presidentin e Parlamentit Evropian Martin Schulz sot, kryeministri grek Alexis Tsipras theksoi rëndësinë e uljes së papunësisë mes të rinjve në Greqi.
"Tani është koha të diskutojmë rreth së ardhmes. Dhe një e ardhme me 60 përqind papunësi nuk është e ardhme. Mendoj se ky është mesazhi, një mesazh i fuqishëm për diskutimin tonë këtu në Bruksel është t’i japin një mesazh popullit grek. Mesazhin e shpresës. Jo vetëm zbatoni, zbatoni zbatoni. Detyrime, detyrime por tani mesazhin se institucioni evropian do të japë ndihmë që të kalohet situate e vështirë në nivelin social".
Zoti Schulz u përgjigj duke thënë se "ka ende mjaft fonde të gatshme" dhe se ishte rënë dakort të krijohej një program për punësimin e të rinjve sa më shpejt që të jetë e mundur por zoti Tsipras tha se tani ishte në dorën e institucioneve të BE-së për të bërë më shumë.
Ndërkohë guvernatori i bankës qëndrore greke tha sot se pasiguria rrezikon ta dëmtojë më tej ekonominë ndërsa Athina tha se do të paguajë këstin prej 340 milion euro ndaj Fondit Monetar Ndërkombëtar.
Greqia është bllokuar në bisedime me partnerët ndërkombëtar në përpjekje për të rinegociuar programin e shpëtimit. Pa një marrëveshje, vendi rezikon të mbetet pa fonde në fund të muajit.