Lidhje

NATO do dërgojë trupa shtesë në Kosovë

  • Leonat Shehu

NATO do dërgojë trupa shtesë në Kosovë

NATO do dërgojë trupa shtesë në Kosovë

NATO-ja do të dërgojë forcave shtesë në Kosovë nga radhët e trupave operacionale rezervë. Ky paralajmërim u bë i ditur pas kërkesës që ka bërë komanda e KFOR-it në Kosovë, pas trazirave që përfshinë veriun e Kosovës të banuar me shumicë serbe.

Zyrtarë të NATO-s nuk kanë shpalosur hollësitë rreth numrit të trupave shtesë që do të ndihmojnë trupat që ndodhen në terren, por zyrtarë të KFOR-it thanë se bëhet fjalë për një batalion.

Aktualisht, KFOR-i ka diçka më pak se gjashtë mijë trupa në Kosovë. Një pjesë e tyre tash e një javë janë përqendruar në veri, për të rivendosur rendin pas dhunës që pasoi operacionin e njësive të posaçme të policisë së Kosovës për të vënë nën kontroll dy vendkalime kufitare më Serbinë. Një pjesëtarë i policisë u vra gjatë një sulmi në afërsi të Zubin Potokut një nga komunat me shumicë serbe, ndërsa njëri nga vendkalimet u dogj nga grupe serbësh.

Forcat paqeruajtëse thanë sot se gjendja në veri është e qetë por e tensionuar, ndërsa po vazhdon bllokimi i rrugëve që çojnë në vendkalimet kufitare nga banorët serbë.

Njësitë e posaçme të policisë së Kosovës, filluan të hënën e kaluar një operacion për vënien nën kontroll të dy vend kalimeve kufitare në veriun e banuar me shumicë serbe. Operacioni u urdhërua nga qeveria e Kosovës në përpjekje për të zbatuar vendimin për ndalimin e importeve nga Serbia, i cili nuk po zbatohej në atë pjesë të Kosovës ku nuk funksionojnë doganat e vendit. Përfaqësuesit e Beogradit kanë kërkuar kthimin në gjendjen e mëparshme, një kërkesë kjo e cila është hedhur poshtë nga Prishtina.

Operacioni i policisë nuk u mbështet nga zyrtarët e Bashkimit Evropian të cilët thanë se ai u ndërmor pa këshillime paraprake me ta, ndërsa bënë thirrje për rifillimin e bisedimeve ndërmjet të Kosovës dhe Serbisë, të cilat qenë shtyrë për në muajin shtator.

Për këtë arsye diplomati britanik, Robert Cooper, përfaqësues i zyrës së shefes së politikës së jashtme të Bashkimit Evropian, Catherine Ashton, u takua dje me përfaqësuesit e Beogradit, ndërsa sot po takohet edhe me ata të Prishtinës. Ende nuk ka pasur asnjë njoftim për diskutimet që është dukë zhvilluar zoti Cooper me të dyja palët.

XS
SM
MD
LG