Lidhje

Vetëm pesë të mbijetuar nga rrëzimi i avionit në Kolumbi


Autoritetet kolumbiane njoftuan se pati vetëm pesë të mbijetuar nga 81 personat që udhëtonin në avionin ku ndodhej edhe një skuadër futbolli nga Brazili. Avioni u përplas gjatë rrugës për në aeroportin ndërkombëtar të qytetit Medellin. Ndërsa po zhvillohen hetime për rrëzimin e avionit, kryebashkiaku i qytetit Medellin e quajti një tragjedi me përmasa të jashtëzakonshme. Alfredo Bocanegra është drejtor i aviacionit civil.

“Pavarësisht se kemi zbuluar paraprakisht se pati defekt elektrik, në këto lloj hetimesh nuk mundemi të përjashtojmë shkaqe të tjera. Dëshmitë e të mbijetuarve do të jenë të vlefshme. Do kryejmë hetim të plotë; në këtë rast aksidenti ndodhi këtu pranë dhe jo në distancë të largët.”

Autoritetet thanë se avioni i tipit “British Airspace 146” i firmës ajrore boliviane “Lamia”, njoftoi për një emergjencë për shkak të një defekti elektrik.

Avioni që kishte bërë një ndalesë në Santa Cruz të Bolivisë, transportonte skuadrën e futbollit “Chapecoense”, nga Brazili jugor. Skuadra do të luante nesër ndeshjen e parë të Kupës së Amerikës së Jugut, përballë skuadrës “Atletico Nacional” të Medellinit. Vetëm tre anëtarë të ekipit i mbijetuan përplasjes.

Federata e Futbollit të Amerikës së Jugut ka anulluar përkohësisht të gjitha aktivitetet.

Autoritetet e aviacionit informuan se avioni kishte në bord 72 pasagjerë dhe 9 anëtarë të ekuipazhit. Sipas mediave lokale, i njëjti avion pati transportuar këtë muaj skuadrën kombëtare të Argjentinës që luajti në një ndeshje në Brazil.

Trego komentet

XS
SM
MD
LG