Opozita ruse mbush sheshin në Moskë

Dhjetëra mijëra rusë u mblodhën sot në një miting në Moskë për të protestuar kundër kthimit të Vladimir Putinit në postin e presidentit të Rusisë, edhe pse disa udhëheqës të opozitës, ndërkohë që demonstrata po fillonte, u detyruan të paraqiteshin për t’u marrë në pyetje nga agjencia e hetimeve. Protesta e sotme, e autorizuar nga qeveria, përkon me festën kombëtare, Dita e Rusisë.

Ky është i pari tubim i organizuar nga opozita, që kur zoti Putin mori detyrën më 7 maj dhe filloi të zbatonte masa shtypëse mbi kundërshtarët e tij gjithmonë e më të vendosur.

Një korrespondent i Zërit të Amerikës tha se në protestën e rrugës Sakharov ishin të pranishëm dhjetëra mijëra njerëz. Mitingu ishte i qetë dhe përfshiu grupe të ndryshme pjesëmarrësish, si nacionalistë, komunistë dhe liberalë.

Marshimi i autorizuar nga qeveria u zhvillua në praninë e mijëra forcave policore. Ai u kryesua nga Sergei Udaltsov, i cili ishte një ndër katër udhëheqësit e protestës të thirrur sot nga policia, për t'u marrë në pyetje lidhur me një demonstratë të mëparshme të opozitës në Moskë.

Zoti Udaltsov nuk iu përgjigj thirrjes së autoriteteve, ndërkohë që disidentët e tjerë Alexei Navalny, Ilya Yashin dhe Ksenia Sobchak u paraqitën në agjencinë e hetimit. Udhëheqësi i opozitës Alexei Navalny shprehu bindjen se ata do të kishin mundësi të bashkoheshin më pas me protestuesit.
"Ndihem shumë mirë. Është e qartë se kjo marrje në pyetje është një formalitet i kotë e qesharak, i cili ka si qëllim të mos i japë mundësi disa njerëzve të flasin në tubimin e sotëm. Jam i sigurt se gjithçka do të shkojë mirë, dhe se shumica prej nesh do të jetë në gjendje të shkojë në rrugën Sakharov. I uroj të gjithëve gëzuar Ditën e Rusisë."

Një ligj i ri i nënshkruar nga zoti Putin të premten do të rrisë 150 herë gjobat për pjesëmarrësit në protesta të paautorizuara, një gjobë kjo afërsisht sa paga mesatare vjetore në Rusi.