Gjykata Kushtetuese rrëzoi sot ankimin e shoqatës së qeramarrësve për të pezulluar vendimin e qeverisë që i nxjerr ata nga banesat e pronarëve të mëparshëm, deri në një rishqyrtim gjyqësor të gjendjes së tyre dhe propozime për strehim të ri.
Ashtu si parlamenti më parë edhe Gjykata Kushtetuese konfirmoi sot si të rregullt aktin normativ të qeverisë për t’u kthyer menjëherë banesat pronarëve, pa u dhënë strehim ose zgjidhje të tjera rreth 3 mijë e 400 familjeve që jetojnë prej 40-60 vjetësh në afro 500 ndërtesa që tani po zbrazen nga përmbaruesit ditë për ditë.
Avokati i këtyre banorëve qeraxhinj të pastrehë, Dorian Matlia, pjesëtar i organizatës Res Publica që ofron avokati falas, tha se vendimi i Gjykatës Kushtetuese do të paditet në gjykatën e Strasburgut, sepse shkel disa të drejta njerëzore bazë të mijëra shtetasve, të cilët shteti vetë i strehoi në këto ndërtesa qysh nga mesi i shekullit të kaluar. Sipas avokatit, vonesa e vendimit nga 31 tetori deri sot u dha 3 muaj kohë përmbaruesve që të përparojnë me zbrazjen e objekteve, duke nxjerrë njerëzit jashtë.
Disa nga këta banorë tregojnë se kanë lindur dhe janë plakur në ato shtëpi dhe kurrë shteti nuk u tha se kanë probleme me pronarët, ndërsa fushata e fundit u ka ardhur si rrufe në qiell të hapur dhe ata realisht po mbeten në qiell të hapur pa asnjë strehë mbi kohë.
Shoqata e qeramarrësve thotë se qeveria me aktin normativ ka marrë disa kompetenca parlamentare, parlamenti ka marrë disa kompetenca të Gjykatës Kushtetuese, ndërsa kjo e fundit noterizoi vendimin e qeverisë, pa dhënë as ajo një zgjidhje ku dhe si do të jetojnë mijëra banorë këtej e tutje, ndërsa një fushatë e gjerë përmbaruesish po i nxjerr me shpejtësi nga banesat në mes të dimrit.