KFOR-i paralajmëron reagim ndaj dhunës

Forcat paqeruajtëse të NATO-s në Kosovë, paralajmëruan sot se do të reagojnë ndaj çdo forme të përdorimit të dhunës dhe armëve nga persona të paautorizuar.
 
Këto komente pasuan takimin e përfaqësuesve të KFOR-it me përfaqësuesit e serbëve lokalë në veriun e Mitrovicës, pas tensioneve të javës që lamë pas në një lagje veriore të këtij qyteti.
 
Në një komunikatë për media thuhet se gjatë takimit është nënvizuar “pakënaqësia e KFOR-it lidhur me zhvillimet në lagjen Kroi i Vitakut dhe  se përfaqësuesit e komunitetit mbahen përgjegjës për tensionet e atjeshme”.
 
Në komunikatë thuhet se “KFOR-i u ka tërhequr vërejtjen përfaqësuesve të komunitetit që të përmbahen nga çdo akt i cili mund të interpretohet si ngritje e tensioneve” dhe se se të vetmet mekanizma të cilëve u lejohet të bartin armë në Kosovë janë: KFOR-i, EULEX-i, Policia e Kosovës dhe Forcat e Sigurisë së Kosovës.
 
“Në rast se KFOR-i sheh ndokënd tjetër të armatosur apo duke e kërcënuar mjedisin e qetë dhe të sigurt në çfarëdo mënyre tjetër, KFOR-i është plotësisht i autorizuar të reagojë shpejt dhe në mënyrë të vendosur dhe të kujdeset që keqbërësit do të dënohen. Përfundimisht përfaqësuesit e komunitetit gjithashtu do të mbahen përgjegjës”, thuhet në komunikatën e forcave paqeruajtëse.
 
Tensionet ndër-etnike u përshkallëzuan gjatë javës së kaluar në lagjen “Kroi i Vitakut” ku grupe të ndryshme serbësh kundërshtuan rindërtimin e shtëpive të banorëve shqiptar të asaj lagjeje.
 
Tensionet që çuan në incidente të dhunshme, pasuan kundërshtimin e përfaqësuesve serb ndaj rindërtimit të shtëpive të shqiptarëve, që ishin shkatërruar gjatë luftës në Kosovë.
 
Përfaqësuesit e serbëve në veriun e Mitrovicës kundërshtojnë rindërtimin e shtëpive ndërsa akuzojnë institucionet e Prishtinës se siç thuhet, po provojnë të ndryshojnë përbërjen etnike të popullsisë në zonë.